لراوبر ویب پاڼه لراوبر يو افغان – تازه خبرونه
پېښور:په پېښور کې د یوه ځانمرګي برید په پایله کې ١٢ کسان وژل شوي ١٢ ټپيان دي . د پېښور پولیسو په وینا دغه برید د جمعې په ګهیځ د صدر بازار په فخرعالم روډ سیمه کې وشو.د پېښور پولیسو یوه افسر خالد محمود همداني وویل، چې بریدګر پلي و او د فرنټیرکور نومي امنیتي ځواک د قوماندان مجید مروت د ګاډو کتار یې په نښه کړ، چې له سیمې د تېرېدو په حال کې و.د پولیسو افسر په وینا چاودنه کې د مجید مروت ګاډي ته زیان و نه رسېد، خو ورسره ګاډو ته زیان اوښتی.د نوموړي په خبره خپله مجید مروت ته هم کوم زیان نه دی اوښتی، ځکه د برید پر مهال د هغه ګاډی مخکې تېر شوی و. د پولیسو په وینا تر اوسه په برید کې د پنځو کسانو وژل کېدل تایید شوي او د فرنټیر کانسټبلري د څلورو عسکرو په شمول ۱۲ کسان ټپیان دي.له پېښې وروسته په سیمه کې مرستندویه فعالیتونه پیل شوي او جسدونه او ټپیان د پېښور لیډي ریډینګ روغتون ته لېږدول شوي دي.د پېښې ځای ته څېرمه د پاکستاني پوځ د تالاشۍ پوسته ده او له همدې ځایه پوځي مرکز ته لار غځېدلې. له پېښې وروسته پوځ سیمه محاصره کړې او په تګ راتګ یې بندیز لګولی.