لراوبر ویب پاڼه لراوبر يو افغان – تازه خبرونه
کابل چاپ ګڼ شمېر ورځپاڼو د چهارشنبې د ورځې په ګڼو کې د نور موضوعاتو ترڅنک له افغان چارواکو سره د جان کري د پرون ورځې لیدنې او د پاکستان او افغانستان په اړیکو باندې لیکنې تبصرې کړي دي.
ویسا:
ویسا خپلواکې ورځپاڼې په خپل لومړي مخ کې لیکي ولسمشر کرزي او جان کري د قطر په دفتر خبرې وکړې.
ورځپاڼه وړاندې لیکي، پرونۍ ناسته تر ډېره له طالبانو سره د سولې پر بحث او د سیمې پر موضوعاتو راټوله وه.
ویسا په یو جلامطلب کې لیکي، د امریکا د بهرنیو چارو د وزیر او د ولسمشر کرزي ترمنځ د خبرو اترو او خبري کنفرانس چاپيریال دوستانه وو.
د لیکوال د معلوماتو له مخې د امریکا او افغانستان ترمنځ اوسمهال اړیکې نورمالې شوې او ستونزې حل شوې دي.
سرنوشت:
سرنوشت ورځپاڼې په لومړي مخ کې په غټو ټکو لیکلي، جان کري له ځینو افغان سیاستوالو او د مدني ټولنې له فعالینو سره د تړلو دوازو ترشاه غونډه وکړه.
ورځپاڼه وړاندې لیکلي میرویس یاسیني، شکریه بارکزۍ، فاروق وردګ، یونس قانوني ، رحمت الله نبیل، ضیالحق امرخیل او ځینو نورو په دې غونډې کې ګډون کړی و.
باور:
باور ورځپاڼې د سرمقالې عنوان دی امریکا له افغانستان سره خپلې اړیکې نه شي کمزورې کولای !
په سرمقاله کې راغلي که وکتل شي امریکا او افغانستان په خپلو کې ژورې سیاسي، اقتصادي اونظامي اړیکې لري، چې په اسانه د شلېدو نه دي.
د لیکوال په اند امریکا اړه ده، چې تر اوږد مهال پورې له افغانستان سره خپلې اړیکې وساتي او نه شي کولای افغانستان یوازې پریږدي.
د لیکوال په باور که امریکا افغانستان یوازې پریږدي، په نړۍ کې به خپل باور له لاسه ورکړي.
خدمتګار:
خدمتګار ورځپاڼې په خپل لومړي مخ کې په غټو ټکو سره لیکلي پاکستان کې د حملو انتقام په افغانستان کې اخیستل کیږي.
د مطلب لیکوال لیکي، په افغانستان او پاکستان کې وروستۍ حملې ښيي چې په خپلو کې سره یو ډول تړاو او ورته والي لري.
ورځپاڼه وړاندې لیکي: په سیمه کې لوبه (ای ،ایس ،ای ) روانه کړې او دغه اداره په پاکستان کې ترسره شویو حملو انتقام په افغانستان کې اخلي.
هېواد:
د هېواد دولتي ورځپاڼې په سرمقاله کې راغلي افغانستان په تېره لسیزه کې له پاکستان سره د اعتماد جوړولو او د باور د پیداکولو په لاره کې بې سارې هلې ځلې کړې دي.
د لیکوال په باور په پاکستان په پراخه توګه د باوراو اعتماد او همکارۍ لپاره د افغانستان هڅو اوهاند باندې بیا بیا سترګې پټې کړې دي.