لراوبر ویب پاڼه لراوبر يو افغان – تازه خبرونه
په ولسي کیسو کې راځي ، چې پخوا یوه چالاکه سړي اوښ ساته ، چې د ډیرګرانښت له وجې او چاغښت لپاره به یې دخلکو په کروندو کې سراېله کړی وو، که کله به یې دکوم چا کرونده زیانمنه کړه ، او کروندګر به داوښ له څښتن سره په جنجال او دعوه واوښتل ، نو داوښ څښتن به دقاضي او دریم په مخکې له خپل عمرخوړلي اوښ څخه په ( اوښ ) تعبیر نه کاوو ، بلکې بیا بیا به یې ویل زما جونګی او زما جونګکی . . .
په دې تعبیر سره به دچالاکه اوښبانه موخه داوه ، چې خپل په جرم ککړ اوښ ته یوڅه برأت او عاطفه ترلاسه کړي ، چې ګوندې یو کوچنی جونګی دی ، څه پروا که دخلکو له کروندو کومه خوله خوراک وکړي ، خو دا سادګړی اوښبه په دې نه پوهیده ، چې دقاضي په قاموس کې داوښ جنایت همیشه په اوښبه باندې تاوان دی ، نور دې ته نه کتل کیږي ، چې زیان اړونکی اوښ دی اوکه جونګی .
آبله ورځ دکندهار په پنجوایي کې امریکایي سرتیري له قرارګاه سراېله شول ، او په شاوخوا کورونو کې یې ګڼ کسان په ډزو شهیدان او زخمیان کړل ، ددې پیښې په غبرګون کې داوباما په مشرۍ امریکایي ادارې کټ مټ داسې له چالاکۍ ډک غبرګون درلود ، چې ماته یې دلوړاوښبه کیسه رایاده کړه .
امریکایانو دپیښې په سهار وختي ددې په ځای چې دپيښې دماهیت په اړه څه ووایي ، رسنیو ته په لیږلي اعلامیه کې ولیکل ( هغه بي دماغه سرتیری !! یې نیولی ، چې بیګا یې په خپل سر یو شمیر افغانان وژلي ) ددې منافقانه اعلامیې له امله په لومړیو کې په خبري اژانسونو کې دپیښې څرنګوالی هم په همدې سرلیک راغی ، خو وروسته معلومه شوه ، چې امریکایي دریځ نیوونکو او اعلامیه لیکونکو دیاد ې پیښې په اړه څومره سپین سترګي او منافقت کړی دی .
داچې که ( بالفرض المحال ) دا جنایت یوازې داوبامایوه جونګکي ( لیوني سرتیري ) سرته رسولی وي ، نو آیا اوښبه اوباما (وأذنابه ) یې له مسؤلیت څخه خلاصیدلی شي او کنه ، دابېل حقوقي بحث دی چې دلته ترې تیریږو ، خو دلته په اصل مدعا باندې بحث کوو ، چې آیا دا څومره رښتیا ده ، چې دا جنایت یوه پالیسي نه بلکه تخطي ده چې یوه سرتیري سرته رسولې .
ددې لپاره چې د زنګاوات دفاجعې په اړه مې په خپلو معلوماتو اتکاء وي ، نن غرمه مې دبالواسطه شناخت نه په استفاده دزنګاوات یواوسیدونکی ( عبدالستار)دتیلفون په کرښه پیدا کړ، او داوباما لوړه دعوه او دریځ مې ورته مخې ته کیښود ، نوموړي په دې موضوع داسې پوه کړم .
( دکندهار په پنجوایي کې دالویه سیمه دزنګاوات په نامه یادیږي ، چې شاوخوا خواره واره واړه کلي او جوماتونه دي ، دامریکایانو قرارګاه دبارکزو په سیمه کې پرته ده ، دقرارګاه مخته ( جنوبي خواته )ښه لرې دنجبیانو په نامه کلی پروت دی ، او دهمدې قرارګاه بل اړخ ( شمال ته ) دالکوزوکلی پروت دی ، ددې دوو کلیو ( نجبیانو او الکوزو ) ترمنځ تقریبا نیم ساعت دپیاده مزل لاره ده ، چې ترمنځ یې امریکایي قرارګاه پرته ده ، دشپې امریکایان راغلي دالکوزو په کلي کې اول دقومي مشرمحمدنعیم کورته ورننوتي ، حاجي محمدنعیم ، زوی او لور یې زخمیان کړي دي ، ورپسې دوه مخامخ نور کورونه دي هغو ته ورننوتي ، چې په یوه کې یې دری تنه شهیدان کړي او په بل کې یې دوه تنه شهیدان کړي دي ، په همدې وخت کې دنجبیانو په کلي کې چې له الکوزو څخه دنیم ساعت مزله په اندازه لرې پروت دی ، دحاجي وزیر کورته ورننوتي ، ددې کور یوولس تنه نارینه ، ماشومان او ښځې یې لومړی په یوه کوټه کې رایوځای کړ بیا یي ویشتلي ، ورپسې یې برسیره بړستنې پرې اچولې او اور یې ورکړی ، دکلي خلکو ویلي چې دا کار دیوه عسکر نه دی ، او نه دیوې ډلې دی ، بلکې دایو سم ترتیب شوی کاروو ، ځکه خلکو ویل ټوله شپه قسماقسم طیارې هم په هوا کې ګرځیدې )
د زنګاوات ددې اوسیدونکي دخبرو په تائید پرون ناوخته دهمدې سیمو ځیني او سیدونکو او قومي مشرانو دکندهار په پریس کلب کې هم خبریالانو عین همدا حکایت وکړ ، او داراز یې فاش کړ ، چې امریکایانو یاد جنایت په منظم ډول دانتقام په توګه سرته رسولی ، چې تردې وړاندې یې هم دسیمې خلکو ته خبرداری ورکړی وو.
دپژواک او افغان اسلامي اژانس دخبرپه اساس دپنجوایي یوه اوسیدونکي حاجي احمدشاه په دې اړه وویل ( څو ورځې مخکې همدلته نږدې دپنجوایي دبلندي څلورلارې په سیمه په امریکایانو چاودنې وشوې ، چې دوی ته په کې تلفات ورسیدل ، تردې چاودنو وروسته امریکایانو خلک وروغوښتل او ورته ویي ویل ، چې ددې تلفاتو غچ به ددوی له کوچنیانو او ښځو واخلي ، دادی له هغه ګواښ سره سم یي داجنایت ترسره کړ )
له یاد تفصیل څخه معلومه شوه ، چې اوباما او داخلي او خارجي ملګرو یې دتل په شان ددې جنایت په عذر وړاندې کولو سره هم یو جنایت ترسره کړی ، او په منظمه توګه یې هڅه کړې ، چې دپیښې په اړه عمومي باور ګمراه او خپل وحشي پوځ ته برأت ورکړي ، افغانان که ایمان او وجدان ته ځان پړ بولي ، نو باید چې امریکایي میډیاته دغوږ ایښودو په ځای خپل عقل وجنګوي ، او د دې پیښې دماهیت په پیژندلو سره امریکایي افغان دښمن دریځ درک کړي .
