سپورټ : د احمد شاه بابا لوبډلي د فټبال خزاني ټورنامینټ وګاټه

د کندهار په احمدشاهي لوبغالي کي د فټبال لوبي خزاني ټورنامينټ تېره ورځ پاى ته ورسېدى او اتلولي يې د احمدشاه بابا فټبال لوبډلي خپله کړه.
په ياد ټورنامينټ کي د کندهار ولايت ١٣ الف لوبډلو برخه اخستې وه چي پايلوبي ته يې د احمدشاه بابا او اتفاق فټبال لوبډلو لاره خپله کړې وه او تېره ورځ له يو بل سره ولوبېدل.

پايلوبه تېر ماځيګر د کندهار په احمدشاهي لوبغالي کي ترسره سوه چي نندارې ته يې سلګونه د فټبال مينه وال راغلي ول او دواړه لوبډلي يې د ښې لوبي کولو په خاطر په چکچکو او ولولو بدرګه کولې.
د احمد شاه بابا لوبډله چي له دې وړاندي يې هم څو ځله د کندهار د فټبال اتلولي تر لاسه کړې وتوانېده چي يو ځل بيا په پرونۍ لوبه کي درې د دوه په مقابل کي اتفاق لوبډله ماته کړې او د اتلولۍ جام خپل کړي.
د فټبال ياد ټورنامينټ يوه نيمه مياشت وړاندي پيل سوى و چي تېره ورځ پاى ته ورسېدى او احمدشاه بابا لوبډلي لومړى، اتفاق لوبډلي دوهم او برېښنا لوبډلي دريم مقام تر لاسه کړى دى.

پر برياليو لوبډلو باندي د يو لړ ځانګړو مراسمو پر مهال د سياليو كپونه او برابري سوي تحفې هم ووېشل سوې .
د كندهار د بدني روزني د امريت امر محمد الله ګلالي خبريالانو ته وويل چې د دې سياليو څخه يې موخه د فوټبال لوبي ته وده وركول او د ځوانو استعدادونو روزل وه .

د احمدشابابا د عالي لېسې د فوټبال لوبډلي مشر سمېع غيرتمل وويل چې د سياليو د لمړي مقام د ګټلو راز يې په پرله پسې او منظمو  تمرينونو كې و.
دا په داسي حال كې ده چې د نوي كال په پيليدو سره به په كندهار كې د يو شمير ولايتونو د متخبو لوبډلو تر منځ ولايتي سيالۍ هم په لاره واچول شي .