لراوبر ویب پاڼه لراوبر يو افغان – تازه خبرونه
طلوع افغان ورځپاڼه د ١٣٩٠ يم کال ١١٩ مه ګڼه
که نن واړه کوچنيان ياست- سبا زلمي ځوانان ياست – او بل سبا مشران ياست
د کاله د افغانانو – تعليم وکړى کوچنيانو
تعليم د ژوند زېور دئ- د شپو و مخ ته لمر دئ- د هري بلا سپر دئ
فرض دئ پر مؤمنانو – تعليم وکړى کوچنيانو
ښه زده کړه د قرآن ده- ښکلا د هر انسان ده – روڼا يې د ايمان ده
سئ به شمار د جنتيانو – تعليم وکړى کوچنيانو
ډېر ښه رفيق کتاب دئ- په ژوند کي نوى باب دئ- خو علم ستر درياب دئ
څه ترې واخلى غواصانو- تعليم وکړى کوچنيانو
لومړى مخلوق قلم دئ- د ژوند ښکلى همدم دئ – ژوندون په محترم دئ
قلم پورته کړى ځوانانو – تعليم وکړى کوچنيانو
وداني مدرسې دي- د دين ښکلي باغچې دي- خوږې پکښي مېوې دي
لوى درمل د رنځورانو- تعليم وکړى کوچنيانو
مکتب لره روان سئ- د علم پتنګان سئ- و شپو ته څيراغان سئ
ډېر ښه وخت لرى زلميانو- تعليم وکړى کوچنيانو
پکښې کي کتابونه- ښايسته ښکلي درسونه- رنګين يې عنوانونه
ترتيب کړي دي پوهانو- تعليم وکړى کوچنيانو
استاد معنوي پلار دئ- پر هر شاګرد حقدار دئ- روڼ زېرى د سهار دئ
خدمت کړى د استادانو- تعليم وکړى کوچنيانو
د علم تاج پر سر کړئ- ژوندون په منور کړئ- شېبه شېبه اختر کړئ
د ميرويس نيکه لمسيانو – تعليم وکړى کوچنيانو
تعليم به مو سر لوړ کړي- د جهل دېب به مړ کړي- دا ستر کار به مو وړ کړي
کوښښ غواړي کشرانو – تعليم وکړى کوچنيانو
کېږدۍ د ژوند زرينه- په علم کړئ رنګينه- چي ژوند سي مينه مينه
تر مابينځ د انسانانو – تعليم وکړى کوچنيانو
د چا چي علم زده وي- ژوندون په ښايسته وي- بې علمه کسان مړه وي
ژوند يې ژوند نه دئ يارانو- تعليم وکړى کوچنيانو
د چا چي علم نه وي- په سترګو به ړانده وي- په ژوند به خوار خسته وي
ژوند بې وي د لېونيانو – تعليم وکړى کوچنيانو
د علم لټون فرض دئ- پر تاسو باندي قرض دئ- و تاسو ته مي عرض دئ
د احمد غازي بچيانو – تعليم وکړى کوچنيانو
پوهان به درڅه جوړ سي- لويان به درڅه جوړ سي- نېکان به درڅه جوړ سي
هڅه وکړئ شاګردانو- تعليم وکړى کوچنيانو
هيواد به مو ودان وي- ښکلا به د جهان وي- سمبول به د زمان وي
همت غواړي هوډ يا ليانو- تعليم وکړى کوچنيانو
دا څو د پند خبري- خوږې لکه شکري- ترې اوري ملغلري
توصيې د شاعرانو- تعليم وکړى کوچنيانو
ښايسته ښايسته ګلان ياست- پر ستوري باندي ګران ياست- راتلونکي افغانان ياست
ژوند مو ښاد اوسئ ګلانو- تعليم وکړى کوچنيانو
