لراوبر ویب پاڼه لراوبر يو افغان – تازه خبرونه
يادښت :
دا په انګريزئ کې يو برقي پيغام دی چې د پښتو نوموړي ليکوال ښاغلي تاج رحيم د ډاکټر همايون هما په نوم راليږلې دی ـ په دی کې زموږ خوږ ژبي ليکوال د خپل يو ارمان ذکر کړی دی ….. زۀ د دی دعا سره دا خط په پښتو کې لوستونکو ته وړاندی کوم چې لوی څښتن دی دَ محترم تاج رحيم دا ارمان ټکي په ټکې رښتيا کړي… چې په دی کې د انسانيت د ذهني روښانتيا يوه ښيګڼه خوندي ده …….. عظمت هما
ډاکټر صاحب:
هغه بله ورځ زۀ په عجيبه خيالونو کې ګير ناست ؤم ـ فکر مې کؤلو چې که زۀ چری د ښه صحت سره يو شل کاله نور ژوندی پاتې شؤم اوکه خدای کړې خير وي نو هر کال به په مختلفو مؤضوعاتو دوه کتابونه ضرور ليکم ـ کيدی شي چې دا ټول په پښتو کې نه وي ځکه چي پښتانه د کتاب لوستو ډير شوق نه لري ـ هر څه چې دي په خوب ليدو کې بدي نشته ـ او زما خوبونه هسې هم ډير خوندناک وي ـ
ما په ژوند کې ښه ډير ليکل کړي دي خو دا ټولې هند سې وی يا تجارتي رپوټونه وۀ ـ داسې ليکونه دوام نه لري او د کار اخستو نه پس سمدستي ورک شي ـ که په کمپيوټر کې وي نو هم وران کړی شي ـ دا کار هم ډير دَ سرخوږي دی ـ خو تخليقي نه وي ـ
زما دا پوخ ايمان دی چې هر کار د لوی څښتن له اړخه د يوی منصوبې لاندی سر ته رسي ـ چي کله وخت راغې چي زۀ په پښتو کې بيا ليکل شروع کړم نو هغه وخت نه مې سوچ کړی وۀ او نه مې دی اړخ ته پام وه …. خو ناڅاپه سټيج جوړ شو او ټول کارنده په ستيج راپيدا شول ـ تاسو هم دا هر څه پخپله وليدل ـ نه پوهيږم چې دا هر څه څنګه اوشو او دی کار پوره نيمه پيړئ ولې واخسته ـ ما د ځان مصروف ساتلو د پاره ليک ته ذهن جوړولوخو زما اراده په انګريزئ کې د ليکلو وۀ ـ که رښتيا رانه تپوس کوی نو پښتو ته زما بيخي شا وه ـ زما يقين نه راځي چې دا هر څه ناڅاپه څنګه اوشو ـ په دغه لوبه کې ته څنګه راګډ شوی ـ زۀ دا هر څه يو اتفاق نه ګڼم ځکه چي نه تاسو د مخکې نه څه منصوبه کړی وه او نه ما ـ دا زموږ د دواړو د پاره يوه جوړه منصوبه وه ـ که مونږ هر څو د يو بل نه په زرګونو ميله لری ناست وو – خو ناڅاپه يو بل ته مخامخ شو ـ زۀ د ټکه پوهه شوم چې دا هغه دائمي قوت دی چې د يوی تړلې منصوبې لاندی ئې واقعات ترتيب کړي دي ـ موږ دغې په منلو مجبور يو ـ موږ که دغه دائمي قوت خپل مخې ته موجود نه وينو خو هغه هر وخت زموږ سره وي ـ وَهُوَ مَعَكُمۡ أَيۡنَ مَا كُنتُمۡ ـ ځکه زۀ خوبونه وينم ـ که هغه چری ما نه څه کار اخستل غواړي نو شل کاله يا څه سيوا ورکړه د هغې لوئې څښتن د پاره څه غټه خبره نه ده – دا به بيا زما ذمه واري وي چې زۀ دغه وخت په ډير ښه مقصد راولم .
تاج رحيم
دسمبر 7 ـ 2011
