لراوبر ویب پاڼه لراوبر يو افغان – تازه خبرونه
خدایه بیا راولې اختر د ورورۍ
زما په ولس په لر او بر د وررۍ
دا ستا رضأ هم په یووالي کې ده
ته مو نصیب کړې بیا جوهر د ورورۍ
سره پخلا او په جرګه کړې واړه
دا واړه ورونه ، مرور د ورورۍ
خدایه بیا راولې اختر د ورورۍ
زما په ولس په لر او بر د وررۍ
واېي د خلکو زور د خداې زور وي
راځۍ بیا جوړ کړو لوې لښکر د ورورۍ
که شو یو موټۍ ، يو قوت شو ورونو
څوک به مو مات کړي دا سنګر د ورورۍ
خدایه بیا راولې اختر د ورورۍ
زما په ولس په لر او بر د وررۍ
د ننواتو او جرګو په رسم
ټول سره کېنۍ په ټغر د ورورۍ
هم سره لاس ورکړۍ وطن آباد کړۍ
په مينه ، مينه په اشر د ورورۍ
خدایه بیا راولې اختر د ورورۍ
زما په ولس په لر او بر د وررۍ
که تېر په هېر کړو او ګذشت یو بل ته
هله پېدا به کړو هنر د ورورۍ
که شو خواږه او په درنښت یو بل ته
نشته دې بل کوم ښه نظر د ورورۍ
خدایه بیا راولې اختر د ورورۍ
زما په ولس په لر او بر د وررۍ
راځۍ چې ځان او جهان وپېژنو
پردي هېڅکله نوي وړ د ورورۍ
مه ورکوئ بل زېرۍ مه ورکوۍ
حامد ته واوروئ خبر د ورورۍ
خدایه بیا راولې اختر د ورورۍ
زما په ولس په لر او بر د وررۍ
د ۲۰۱۱ع کال د اګست د میاشتې ۲۹مه ستاکتن کليفورنیا
