لراوبر ویب پاڼه لراوبر يو افغان – تازه خبرونه
لراوبر : په بخښني سره ددې راپور عکسونه وروسته پرليکه کيږي .
د نیکمرغه کوچني اختر د رارسیدو له امله د استرالیا په نیوساوټ ویلز کې له سیدني نه خپریدونکې شمله راډیو د دوشنبې پر ورځ چې د روان کال د اګست له نهه ویشتمې سره سمون خوري د سیدني په بارووډ سیمه کې یو اختریز بنډار او مشاعره جوړه کړه.
دغه مشاعره او بنډار چې عمدتا پکې سیدني میشتو پښتنو شاعرانو او د شمله راډیو کارکوونکو او کورنیو یې ګډون کړی ووپه ژوندۍ بڼه د شمله راډیو له خوا خپریده.یاده مشاعره چې د لیمه هادي له خوا چلول کیده په سیدني کې د شمله راډیو د مشر ،شاعر او لیکوال عبدالهادي هادي په هرکلیزو خبرو پیل شوه چې ورپسې دکوچني اختر په مناسبت په نیوساوټ ویلز کې د افغانانود همکارۍ د کمیټې ، په نیوساوټ ویلز کې د پښتنو د سولې او ملاتړ د کمیټې او ځینو نورو کلتوري ټولنو او سیدني میشتو پښتنو شخصیتونو د مبارکیو پیغامونه پکې ولوستل شول.
د یادولو وړ ده چې د مشاعرې په منځ منځ کې د یوشمیر خوست میشتو شاعرانو شعرونه او همدا شان د یاد ولایت د محلي سندرغاړو سندرې چې د کوچني اختر په مناسبت د شمله راډیو همکار قادرشاه ثبت کړې او رالیږلې وې هم خپریدې چې د اوریدونکو او د مشاعرې د ګډونوالو د بیسارې خوښۍ سبب شوې.
مشاعره د لیمه هادي له خوا د نامتو شاعر سلیم قرار د اختر جوړه په نوم مشهور نظم په لوستلو او دیکلیمه کولو پیل شوه چې ورپسې په ترتیب سره خوږ ژبي شاعر انجنیر عیسی منګل،په نیوساوت ویلز کې د پښتنود سولې او ملاتړ کمیټې مشر او ښه شاعر ننګیال پښتونیار،تکړه شاعر شکرالله طاهري،عبدالهادي هادي او یو شمیر نورو خپل شعرونه ولوستل چې د مشاعرې د ګډونوالو د خوښې وړ وګرځیدل.
د یادونې وړ ده چې شمله په ټوله استرالیا کې یواځینۍ رسنۍ ده چې په پښتو ژبه خپرونې کوي او وخت نا وخت ځیني کلتوري ناستې جوړوي.
