لراوبر ویب پاڼه لراوبر يو افغان – تازه خبرونه
د کندهار ولايت په سپين بولدک ولسوالۍ کي د لومړي ځل دپاره د کندهار والي په مشرۍ پرمختيايي غونډه چي کندهار ښاروال ، امنيه قوماندان او يو شمېر نورو رئېسانو برخه اخستې وه جوړه سوه .
لومړى کندهار والي خبري وکړې او وې ويل چي دا لړۍ يې مخکي ارغنداو ، ډنډ او پنجوايي ته غزولې وه خو اوس يې سپين بولدک ته هم وغزوله .
وروسته د بولدك ولسوالۍ اداري مدير د غونډي كډونوالو ته د خپلو ستونزو او تر سره سوو كړنو په باب پوره معلومات وركړل هغه په ولسوالۍ كي د مامورينو، په ښونځيو كي د مسلكي استادانو د كمښت، د څښاك لپاره د پاكو اوبو د نه موجوديت، د زراعت په برخه كي د كارونو د نه تر سره كېدو په اړه وويل چي دا لومړنۍ ستونزي دي چي بايد د دوى سره پکښي کومک وسي .
وروسته په وار سره د سكتوري ادارو رئسانو هريوه د عامي روغتيا رئيس ډاكټر عبدالقيوم پخلا، د فوائد عامي رئس انجينر عبدالمحمد احسان ، د زراعت رئيس انجينر احمد شاه روشن، د ګمرك نماينده او د پوهني رياست مرستيال نجيب الله احمدي په ياده ولسوالۍ كي د خپلو تر سره كړو فعاليتونو او د خلكو د روانو ستونزو ته د حل موندني په برخه كي بشپړ معلومات وركړل او د كندهار والي لخوا څخه په ځينو برخو كي د موجوده ستونزو د هوارۍ په برخه كي لازمي لار ښووني وسوي .
پاته دي نه وي چي دكندهار ولايت د سپين بولدك ولسوالي دكندهار ښار ختيځ لوري ته په ۱۸۰كيلو متري كي پرته سرحدي ولسوالۍ ده چي زيات شمير اوسيدونكي يي په تجارت بوخت دي