لراوبر ویب پاڼه لراوبر يو افغان – تازه خبرونه
په کابل کې خپريدونکو ورځپاڼو نن تر ډيره ترکمنستان ته د ولسمشر کرزي په وروستي سفر او په هېواد کې د سولې او پخلاينې په روانو هڅو بحثونه کړي، چې حميد مومند په لاندې مطلب کې رانغاړلي دي.
اراده:
ارادې خپلواکې ورځپاڼې په خپله سرليکنه کې په هغو مسايلو تمرکز کړې، چې ولسمشر له ترکمن چارواکو سره پرې خبرې کړي.
ورځپاڼې دا سفر په هېواد کې د سولې له روانو هڅو سره هم تړلې بللې او په دې ترڅ کې د سولې د عالي شورا نظر راخيستې، چې د خپلو هڅو لپاره د سيمې د هېوادونو د همکارېو جلبول ضروري بولي.
ورځپاڼه ليکي، د سولې عالي شورا په دې باور ده، چې د سيمې هغه هېوادونه، چې د افغانستان په وړاندې ناپيلې دريځ لري کولې شي د سولې په ټينګښت کې مهم رول ولوبوي.
د ورځپاڼې په وينا د سيمې د هېوادونو اقتصادي تړاو هم د سولې په روانو هلو ځلو کې د دوي اغيزمنتيا زياتولې شي.
ويسا:
ويسا خپلواکې ورځپاڼې بيا په خپل بحث کې هغه هڅې څيړلي، چې په هېواد کې دننه د سولې او پخلاينې لپاره روانې دي.
ورځپاڼه په دې ترڅ کې هغې غونډې ته اشاره کوي، چې پرون د هېواد د بېلابېلو قومونو د مشرانو او د ملي شورا د اوسنيو او پخوانيو غړو له خوا جوړه شوې وه.
د ورځپانې په وينا په دې غونډه کې په يو مخيز ډول په هېواد کې له جنګي سياستونو سره مخالفت څرګند شو او سوله د هر افغان په بڼه تعريف شوه.
د ويسا په باور روانې هلې ځلې او د سولې مخ په زياتيدونکې ملاتړ يو ښه فرصت دې، څو ټول ولس په يوه محور راټول شي.
هېواد:
د هېواد دولتي ورځپاڼې په وينا افغان ولسمشر له ترکمن مشرانو سره د ځينو نورو مسايلو ترڅنګ په هېواد کې د امنيتي مسؤليتونو د ليږد بهير په اړه هم خبرې وکړي او هغه يي خورا حساس وبلل.
ورځپاڼه ليکي، چې ښاغلي کرزي له ټولو ګاونډيو هېوادونو څخه وغوښتل، چې د دغه بهير په برياليتوب کې دې له افغانانو سره همکاري وکړي.
ورځپاڼه ليکي، چې ښاغلي کرزي په دې سفر کې د ترکمنستان په ګډون يو ځلې بيا ټولو ګاونډېو هېوادونو ته دا ډاډ ورکړ، چې د افغانستان او امريکا ترمنځ ستراتيژيکې اړيکې د هيڅ ګاونډي هېواد په زيان نه دي.
په کابل کې خپريدونکو پاتې ورځپاڼو هم خپل د نن ورځې مهم سرليکونه ترکمنستان ته د ولسمشر کرزي سفر او د دواړو هېوادونو ترمنځ اړيکو ته ځانګړې کړي.