لراوبر ویب پاڼه لراوبر يو افغان – تازه خبرونه
دافغانستان کرکټ بورډ له ولایتي استازیو سره په جوړه شوي ناسته کې په بیلا بیلو مضوع ګانو خبرې وکړې او د کرکټ د لاپرمختیا په اړه یې راغلیو استازیو ته سلامشورې ورکړې.
پدې اړوند د افغانستان دکرکټ بورډ اجراییوي مشر نسیم الله دانش وویل چې ولایتي استازي د افغانستان داخلي کرکټ په جوړښت کې د ملا د تیر په څیر دنده پر غاړه لري او د دوی لپاره د لا غښتلو طرحو او پلانونو په لار اچول د افغانستان د کرکټ روښانه راتلونکي لپاره یو کلیدي راز دی. دانش زیاته کړه چې د افغانستان کورني کرکټ په جوړښت کې د ولایتي استازو د شتون اهمیت را په ګوته کوي.
دا ناسته دا د لپاره وشوه چې له ولایتي استازو سره د افغان کرکټ بورډ همغږي لا پراختیا ومومي او د چارو لا شفافیت په موخه غوره تګلارې او لارې چارې په عمل کې په سمه توګه پلي شي. دا د ترڅنګ پدې هم خبرې وشوې چې په هیواد کې د کرکټ راتلونکي لپاره د غوره پلانونه تنظیم شي، د ولایتي استازو په دندو کې د غوره شفافیت په موخه د کره تګلاره او مقررات برابرشي .
په دغه ناسته کې د هیواد کابو ۲۴ ولایتي استازو ونډه اخیستې وه چې هره یوه د کاري لایحې او د یو استازي کریټریا (غوراوي) قانون په چمتو کولو کې کره ونډه واخیسته.
ددې ناستې په ترڅ کې د زونونو په ارزښت هم خبرې اترې وشوې او له سیمه ایز مسئول سره د ولایتي استازو د اړیکو پر اهمیت او همغږۍ هم خبرې وشوې.
د ناستې تنظیمونکي دولت احمدزي هم په ټینګار سره، له سیمه ایزو مسئولینو سره د ولایتي استازي پر سالمې همغږۍ او اړیکو ټینګار وکړو او ولایتي استازي یې په دندو کې د لا غوره شفافیت او بې سارو هڅو په لور د نویو تګلارو په معرفي کولو سره راوبلل.
دغه ناسته د کرکټ روښانه راتلونکي لپاره یو مثبت سګنال دی چې د ورته نورو ناستو په واسطه به تعقیبیږي. همدارنګه، د افغان کرکټ بورډ اداره په پام کې لري تر څو له سیمه ایزو مسئولینو سره هم ورته ناستې ولري او د کره پلانونو چمتو کولو او پلي کولو کې له دوی سره همغږې تګلارې پلي کړي.
