لراوبر ویب پاڼه لراوبر يو افغان – تازه خبرونه
په کابل کي د اېران سفير فداحسين مالکي پر افغان حکومت ږغ کړى چي د ده د هيواد پر ضد مظاهره چيان ونيسي، کنې دوى به له افغانستان سره پر ترانزيټي تړون باندي له سره غور وکړي، چي عواقب به يې د افغانستان په تاوان وي.
مالکي وايي په کابل کي د اېران ضد په وروستيو مظاهرو کي ځيني بهرني هيوادونه لاس لري او خلګ د اېران پر ضد راپاروي.
بلي خوا ته د افغانستان د حکومت يوه وياند محمدرفيع فردوس بي بي سي راډيو ته ويلي چي کابل تهران نه دئ، دلته د قانون له مخي هرڅوک د خپلو حقونو په دفاع کي د سوله ايزو مظاهرو حق لري.
همدا راز د کابل پوهنتون د حقوقو د پوهنځي استاد نصرالله ستانکزى وايي اېران ته ښايي چي د افغانستان د اساسي قانون درناوى وکړي او دغه هيواد هيڅ حق نه لري چي د افغانستان له حکومت څخه د خلګو د نيولو غوښتنه وکړي او د افغانانو پر قانوني حقونو باندي پښې کښېږدي.
تېره اونۍ په کابل کي د اېران پر ضد څو پرله پسې مظاهرې وسوې چي له اېراني چارواکو څخه يې افغانستان ته د تيلو د پرېښولو او په دې هيواد کي پر افغان مهاجرو د ظلم او تېريو د مخنيوي غوښتني کولې.
اېران له يوې نيمي مياشتي راهيسي شاوخوا ٢٠٠٠ د تيلو ټانکران پر افغان پوله درولي او په دې پلمه يې افغانستان ته نه پرېږدي چي وايي دغه تيل ناټول ته وړل کېږي.
بلي خوا ته افغان چارواکي او سوداګر وايي ناټو د سوند توکو اکمالات له پاکستان څخه کوي او اېران د نړۍ والو ترانيزټي قوانينو له مخي هيڅ حق نه لري چي پر افغانستان بنديز ولګوي.