لراوبر ویب پاڼه لراوبر يو افغان – تازه خبرونه
د افغانستان ولسمشر حامد کرزي د ناټو له عمومي قومندان جنرال پيټريوس سره په ليدنه کي موافقه کړې ده، چي بهرني ځواکونه په افغانستان کي د شپې له خوا عملياتو ته دوام ورکړي.
ولسمشر کرزي تر دې دمخه د شنبې په ورځ له واشنګټن پوسټ ورځپاڼي سره په مرکه کي نيوکه کړې وه، چي بهرني ځواکونه دي په افغانستان کي د خلګو پر کورونو باندي د شپې له خوا چاپې نه وهي.
ولسمشر کرزي ويلي وو چي افغانان په خپلو کوڅو او بازارونو کي بهرني پوځيان نه خوښوي، دوى دي د خلګو پر کورونو د طالب او القاعدې په پلمه د شپې له خوا چاپې نه وهي او خپل عمليات دي تر خپلو مرکزونو پوري محدود کړي.
کرزي له واشنګټن پوسټ ورځپاڼي سره ويلي وو چي د يوه طالب د نيولو يا وژلو په خاطر د څو ملکي کسانو وژل، نيول يا ځورول هيڅ ګټه نه کوي او دا کار د طالبانو ليکو ته نور کسان هم ور ماتوي.
خو په افغانستان کي د ناټو ځواکونو ويلي چي ولسمشر کرزي تر دې نيوکو وروسته له جنرال پيټريوس سره ليدنه کړې او بيرته يې له دې عملياتو سره موافقه کړې ده.