لراوبر ویب پاڼه لراوبر يو افغان – تازه خبرونه
د افغانستان ولسمشر حامد کرزي نن په کابل کي د سواد د نړۍ والي ورځي په مناسبت په يوه غونډه کي پر وسله والو طالبانو ږغ وکړ، چي د پرديو هيوادونو په لمسون دي د خپل هيواد ښوونځي، روغتونونه او عامه تاسيسات نه ورانوي.
نوموړي دغه راز له طالبانو وغوښتل چي د افغانستان د ملي ګټو، په هيواد کي د سولي او امنيت د ټينګښت په خاطر وسلې پر مځکه کښېږدي او له حکومت سره خبرو ته حاضر سي.
ولسمشر کرزي په دې غونډه کي په ژړغوني آواز وويل چي غواړي د يوه عادي افغان په څېر په هيواد کي دننه د افغاني استادانو تر روزني لاندي په خپل زوى ميرويس باندي زدکړي وکړي او نه غواړي چي زوى خارج ته د زدکړو دپاره ولېږي.
ولسمشر کرزي يو ځل بيا پر طالبانو ږغ وکړ چي له حکومت سره خبرو ته کښېني.
ښاغلي کرزي پر داسي مهال يو ځل بيا طالبانو ته د سولي وړانديز وکړ، چي د ناټو عمومي قومندان پرون ويلي وو، لوړ پوړو طالب مشرانو له افغان دولت سره تماسونه نيولي دي او امريکا هم له دې هڅو څخه ملاتړ کوي.