لراوبر ویب پاڼه لراوبر يو افغان – تازه خبرونه
يادونه: د بي، بي، سي له پښتو څانګي څخه په مننه:
افغانستان د لويو وچو په سياليو کې سکاتلند ته په ٢٢٩ منډو ماتې ورکړه او اوس د اوو هيوادونو په اتلوليو کې لومړى مفام لري.
د څلورمې ورځې په پيل کې سکاتلند غوښتل چې کرۍ ورځ لوبه وکړي خويوازې اته لوبغاړي ورپاتې و ،
افغان لوبغاړو بايد اته لوبغاړي سوځولي واى او د دې کار لپاره يې ٩٦ اوورونه لرل .
د سکاتلند لپاره برى ناشونى ښکاريد ٥٤٦ مندې په خولۀ ياديږي شايد همدا علت و چې سکاتلنديانو هم تر منډو د وخت ضايع کولو ته ډير پام کاوه ،
افغان بالران په پيل کې ډير نه ځليدل ، سکاتلند دفاع ته ملا تړلې وه
د سکاتلند لومړنى لوبغاړى نن عبدالله مزاري وسوځاوۀ .
له هغه لږ وروسته حميد حسن څلورم لوبغاړى انتظار خونې ته واستاوۀ .
د غرمنۍ تر وقفې سکاتلديانو نيمه لوبډله له لاسه ورکړې وه او داسې ښکاريدل چې لوبه به ژر ختمه شي .
خو سکاتلديانو دفاع ته ملا وتړله او تر مازديگرنۍ وقفې يې يوازې دوه نور لوبغاړي وسوځيدل .
د ورځې په وروستۍ برخه کې د حميد حسن په توپ شهزاد يو اسالنه کيچ هم وغورځاوۀ .
خو د افغانستان تر ټولو بريالي بالر حميد حسن دوه نور لوبغاړي او سميع الله شينواري يو کس وسوځاوۀ او په دې توگه افغانستان په ٢٢٩ منډو دا لوبه وگټله .
د حميد حسن وياړ
حميد حسن لومړنى افغان بالر شو چې په څلور ورځنيو لوبو کې يې دوه وارې پنځه يا تر پنځو ډير لوبغاړي سوځولي دي .
دى دا وياړ هم لري چې په يوې لوبې کې يې تر لسو ډير لوبغاړي سوځولي .
په دغه لوبه کې حميد په لومړي وار شپږ او په دويم ځل پنځه لوبغاړي وسوځول .
تر دې وړاندې يوازې دولت احمدزي له ايرلند سره د پنځو لوبغاړو په سوځولو توره کړې وه ،
سکاتلند تر اوسه د لويو وو په کپ کې لومړى مقام درلود او افغانستان په دريم نمبر و .
خو د افغانستان له بري سره اوس افغان لوبغاړي په اول مقام او سکاتلنديان په دويم نمبر دي .
افغانستان له کينيا سره او سکاتلند له زمبابوې سر ه خپله وروستۍ او شپږمه لوبه کوي ،
د اول او دويم مقام موندونکي به د نومبر په مياشت کې پايلوبه کوي .
که افغانستان له کينيا لوبه ونه بايلي او سکاتلند له زمبابوې سره بريالى نه شي نو شايد پايلوبه د زبمبابوې او افغانستان وي .
نور اتلان
له سکاتلند سره په دې لوبه کې د افغانستان گڼ نور اتلان هم و .
سميع الله شينواري په لومړي ځل په څلور ورځنيو لوبو کې سليزه وکړه .
محمد شهزاد ناسوځيدلې سليزه وکړه چې د لوبيز ژوند دويمه سليزه وه .
اصغر ساتنکزي ٩٣ منډې او کريم صادق ٦٧ منډې وکړې چې د دوى دواړو د لوبيز ژوند تر ټولو ډيرې منډې وې .
