لراوبر ویب پاڼه لراوبر يو افغان – تازه خبرونه
د کندهار چارواکو پر دغه ښار د امنيتي کمربند د راګرځېدو خبر ورکړ.
د دې ولايت د ولايت مقام څخه خپره سوې خبرپاڼه وايي چي دغه کمربند د ښار پر شاوخوا له ١٦ امنيتي پوستو څخه تشکيل سوئ دئ، چي موخه يې ښار ته د ننوتونکو او له ښاره د وتونکو موټرانو تلاښي او د خلګو څارنه ده.
خبر پاڼه وايي نن له غرمې ورسته دكندهار ولايت امنيه قومندان سردار محمد ځاځى، د امنيت آمر فضل احمد شيرزاد او كندهار ښاروال غلام حيدر حميدي پر كندهار ښار باندي د حلقوي كمربند څخه دنژدې ليدنه وكړه.
د خبر پاڼي له مخي په دغه امنيتي پوستو كي د آيساف او پوليسو لخوا مؤظف سرتيري پر شپه او ورځ اوسېدو سربيره په خپله سيمه کي شاوخوا ګزمې کوي چي د دولت د مخالفينو د بريدونو مخه ونيسي.
دكندهار ولايت امنيه قومندان د امنيتي كمربند څخه د ليدني پر مهال وويل(( پر كندهار ښار باندي راګرځول سوى امنيتي كمربند چي ديو شمير پوستو څخه جوړ سوى دى هدف يي د كندهار ښار د اوسيدونكو لپاره د هوسا او آرام ژوند زمينه برابرول دي تر ځو دوى په ډاډه زړه د امنتيت په فضاكي ژوند وكړي))
دكندهار ولايت ښاروال غلام حيدر حميدې بيا د امنيتي كمربند په اړه وويل(( پركندهار ښار باندي د امنيتي كمربند د پوستو لپاره ټاكل سوې سيمې چي د پوليسو په اختيار كي دي د هغوي رسمي اسناد د كندهار ښاروالى لخوا د پوليسو په اختيار كي وركړل سوې او موقيعتونه يي هم د خلكو سره په تفاهم ټاكل سوي دي .))
پر كندهار ښار باندي دامنيتي كمربند كار 80 سلنه بشپړ سوى چي پاته به يې په نژدې څو ورځو كي بشپړ سي.