لراوبر ویب پاڼه لراوبر يو افغان – تازه خبرونه
د طالبانو وياند ذبيح الله مجاهد د لوېديځو رسنيو هغه خبرونه رد کړل، چي ګني د مولوي جلال الدين حقاني ډلي چي مطبوعات يې د حقاني شبکه بولي د افغانستان له حکومت سره خبري شروع کړي دي.
طالبان وايي دغه خبرونه غربيانو له خوا د دوى د ماتي او حقايقو څخه د پټولو په خاطر خپرېږي او موخه يې دا ده چي د طالبانو په منځ کي اختلاف واچوي.
ذبيح الله مجاهد لراوبر ويبپاڼي ته د يوې خبرپاڼي په لېږلو سره د الجزيرې او نورو رسنيو پر دې خبر سخت انتقاد کړى او وايي چي رسنۍ دي د دغسي بې بنياده خبرونو له خپرولو څخه ډډه وکړي، چي اعتبار ته يې زيان ونه ورسېږي.
د طالبانو او افغان حکومت ترمنځ تر دې دمخه هم ډېر خبرونه خپاره سوي دي، چي طالبانو هرکله رد کړي دي. خو دا ځل افغان حکومت هم د هغو خبرونو له حقيقت څخه انکار کړئ چي وايي د جلال الدين حقاني د ډلي مشر سراج الدين حقاني د پاکستان د استخباراتي ادارې په منځګړتوب دوه ځله له حامد کرزي سره په کابل کي کتلي دي.