ورځپاڼو ته کتنه

اراده:
دې خپلواكې ورځپاڼې پخپله سرمقاله كې له واشنګټن وروسته لندن ته د افغان ولسمشر كرزي د سفر په اهدافو ، بحث كړې او ليكلي، دا، چې نوي بريتانوي چارواكي به د افغانستان له روانو پيښو سره څه ډول چلند وكړي دا به ددوى راتلونكې كړنې روښانه كړي.
ورځپاڼې د امريكا او بريتانيى د بهرنيو چارو وزيرانو ترمنځ د ليدنې په اړه هم، چې د ورځپاڼې په وينا د بحث اصلي موضوع يى افغانستان وو يو مطلب خپور كړې او ليكلي، چې افغانستان لا هم ددوى لومړيتوب دې.
په ورځپاڼه كې د افغانستان د روانو حالاتو په اړه د جرمني ددفاع د پخواني وزير څرګندونې هم راخستي او ليكلي، هغه څه، چې په افغانستان كې روان دي هغه جنګ دې.

هيواد:
دې دولتي ورځپاڼې د خپل لومړي مخ غټ سرليك د بريتانيى له صدراعظم سره د ولسمشر كرزي ليدنې ته ځانګړې كړې او ليكلي، چې پدې ليدنه كې د كابل او لندن ترمنځ د اړيكو په لا پياوړې كولو ټينګار وشو.
ورځپاڼې پخپله سرمقاله كې بيا واشنګټن او لندن ته د افغان مشر په وروستي سفر او د دواړو هيوادونو له مشرانو سره په شويو خبرو بحث كړې او ليكلي، چې دا سفر د درې واړو هيوادونو ترمنځ د ستراتيژيكو اړيكو د نوي پړاو پيلامه ده.
په ورځپاڼه كې د افغان او امريكايي مشرانو ګډې اعلاميى ته هم يوه ځغلنده كتنه شوې او هغه د دواړو هيوادونو ترمنځ د اوږد مهاله ستراتيژيكو اړيكو يوه بيلګه بلل شوې.

ويسا:
دې خپلواكې ورځپاڼې بيا پخپله سرمقاله كې د افغان او امريكايي مشرانو په ګډې اعلاميى بحث كړې او كه څه هم هغه يى د افغانستان لپاره مهم بللې، خو پوښتلي، چې ايا ددې اعلاميى د عملي كولو اراده شته او كه څنګه؟
دې ورځپاڼې هم په يو مطلب كې د افغانستان په اړه د امريكا او بريتانيى دريځونو ته كتنه كړې او د دواړو هيوادونو د بهرنيو چارو د وزيرانو ليدنې ته په اشارې ليكلي، چې دواړه خواوې ژمنې دي، چې په افغانستان كې د ناټو روانه ستراتيژۍ د برياليتوب تر پړاووه پرمخ بوزي.
ورځپاڼې په افغانستان كې د خصوصي امنيتي كمپينو د فعاليتونو په اړه، چې د ورځپاڼې په وينا فساد ته لمن وهي د يو بريتانوي څيړونكي څرګندونې راخستي او د هغه په حواله يى ليكلي، چې ناټو په افغانستان كې د هر ډول مركزي جوړښت په رامنځ ته كولو كې پاتې راغلې دې.

افغانستان ټايمز:
دې انګلسي ژبې خپلواكې ورځپاڼې بيا د خپل لومړي مخ په يو مطلب كې د بريتانيى له نوي صدراعظم سره د افغان ولسمشر په ليدنې بحث كړې او د بريتانيى د نوي صدراعظم په حواله يى ليكلي، چې هيواد يى يو باثباته او پياوړي افغانستان ته ژمن دې.
ورځپاڼې پخپله سرمقاله كې هم د ډيوډ كيمرون او د ولسمشر كرزي ترمنځ په ليدنې بحث كړې او هغه يى د دواړو هيوادونو ترمنځ د اړيكو د پياوړې كولو لپاره خورا مهمه بللې.
ورځپاڼې پخپل ننني كارټون كې په افغانستان كې اداري فساد او د كوكنارو كښت د سولې د هڅو په وړاندې يو خنډ ښودلې او د هغې د لرې كولو غوښتنه يى كړې.

اصلاح او انيس:
دې دولتي ورځپاڼو هم په بيلابيلو مطالبو كې د افغانستان او سيمې د روانو حالاتو په اړه خبرونه او تبصرې خپاره كړي دي.
انيس بيا پخپله سرمقاله كې د افغان ولسمشر او بريتانيى د لومړي وزير ترمنځ په ليدنې او شويو خبرو تبصره كړې او ليكلي، چې لندن ته د ولسمشر كرزي سفر دا ښۍ، چې د ترورزم پر ضد د روانې مبارزې لپاره د واشنګټن، كابل او لندن ترمنځ ګډ دريځ موجود دې.
خو اصلاح بيا د بهرنيو ځواكونو په وروستيو عملياتو كې د عامه خلكو وروستۍ مرګ ژوبلې ته په اشارې پدې اړه د خلكو انديښنې راخستي او د هغې د مخنيوي لپاره يى د جدي اقداماتو غوښتنه كړې.

ملي ارمان:
دې نا دولتي ورځپاڼې بيا په يو مطلب كې يو شمير افغان قاضيان او څارنوالان تورن كړي، چې د بګرام او د ګوانتانامو له بنديانو رشوت اخلي.
ورځپاڼې په دوام كې د مشرانو جرګې د شكايتونو د كمسيون د مشر په حواله ليكلي، چې له بګرام او ګوانتانامو څخه راليږدول شوي بنديان دوى ته شكايت كړې، چې يو شمير قاضيان او څارنوالان له دوى نه ددوى د دوسيو د څيړلو لپاره د پيسو غوښتنه كوي.
ورځپاڼې پخپله سرمقاله كې د ولسي جرګې د كانديدانو له لومړني لسټ نه د يو شمير كانديدانو د نومونو د لرې كولو په مسئلې بحث كړې او پدې برخه كې شتو ځينو ستونزو ته په اشارې پوښتلي دي، چې دا سياسي چلند وو او كه تخنيكي.