ورځپاڼو ته کتنه

سرنوشت:
دې خپلواكې ورځپاڼې د خپل لومړي مخ غټ سرليك د افغان او امريكايي مشرانو ليدنې ته ځانګړې كړې، چې ددوى په وينا خورا ګټوره وه.
ورځپاڼې ددې ليدنې په اړه د دواړو مشرانو څرګندونې هم راخستي او ليكلي، چې پدې ليدنه كې په افغانستان كې د عامه خلكو د مرګ ژوبلې په مخنيوي او د افغانستان خپلواكۍ ته په درناوي سره له ولسمشر كرزي سره د واضح همكارۍ په دوام خبرې وشوې.
ورځپاڼې په يو جلا مطلب كې د سولې له ملي مشورتي جرګې نه د حزب اسلامي د مشروط ملاتړ خبر هم وركړې او ليكلي، چې حزب اسلامي ددې جرګې غړيو ته د هيواد د راتلونكي په اړه د پريكړې د پوره واك د وركولو غوښتنه كړې.
ورځپاڼې پخپله سرمقاله كې په بګرام كې د امريكايي ځواكونو د پټ زندان په موجوديت بحث كړې او هغه يى د امريكايي ترهګرۍ يوه بيلګه بللې ده.

هيواد:
دې دولتي ورځپاڼې هم د خپل لومړي مخ په غټ سرليك كې د افغان او امريكايي مشرانو په ليدنې بحث كړې او ددې ترڅنګ، چې د دواړو مشرانو ترمنځ د ليدنې انځورونه خپاره كړي ليكلي، چې بارك اوباما له افغانستان سره د امريكا د هر اړخيز غوڅ ملاتړ ژمنې تكرار كړې.
ورځپاڼې خپله سرمقاله هم دې ليدنې ته ځانګړې كړې او ليكلي، چې دواړو لوريو پدې ليدنه كې د امريكا او افغانستان ترمنځ په ټولو برخو كې د ستراتيژيكو اړيكو په پياوړې كولو ټينګار وكړ.
ورځپاڼې په افغانستان كې له قوانينو د سرغړونې په مسئلې هم بحث كړې او ليكلي، چې ددى كار مخنيوې غوڅ اقدامات غواړي.

راه نجات:
دې نا دولتي ورځپاڼې بيا ليكلي، چې د افغان ولسمشر او د هغه د امريكايي سيال ترمنځ ليدنه، چې د سپينې ماڼۍ د بيضوي سالون كې شوې په تيرو اتو كلونو او د دواړو هيوادونو د اړيكو په تاريخ كې بې څارې مهم وو.
ورځپاڼې د سولې د جرګې په اړه د افغان او امريكايي چارواكو څرګندونې هم راخستي، چې پكې دا جرګه د سولې لپاره يو مناسب فرست بلل شوې او د هغې ملاتړ شوې.
ورځپاڼې د بريتانيى د بهرنيو چارو د نوي وزير څرګندونې هم راخستي، چې پكې په افغانستان كې د دوى د ځواكونو له حضور نه ملاتړ څرګند شوې.
په ورځپاڼه كې د ښوونځيود انجونو د مسمومولو پيښو ته په اشارې ليكل شوي، چې افغان ولسمشر امنيتي چارواكو ته دنده سپارلې، چې د ښوونځيو د خوندي ساتلو لپاره جدي تدابير ونيسي.

ويسا:
دې خپلواكې ورځپاڼې بيا د خپل لومړي مخ په غټ سرليك كې د امريكا د ولسمشر د وينا دا ټكي راخستي، چې له ولسمشر كرزي سره ښې اړيكې لرو او د افغانستان ملي حاكميت ته درناوى كوو.
ورځپاڼې د بارك اوباما په حواله دا هم ليكلي، چې يوازې په پوځي هڅو بريا ممكنه نده او دوى هڅه كوي سياسي هڅې هم پيل كړي.
ورځپاڼې په عينې حال كې د افغانستان د امنيت د ملي شورا دا خوشبيني هم راخستي، چې ويلي ممكن يو زيات شمير طالبان د سولې له پروګرام سره يو ځاى شي.
دې ورځپاڼې هم د بريتانيى د بهرنيو چارو د نوي وزير څرګندونې راخستي او ليكلي، چې افغانستان به دده په كاري لومړيتوب كې ځاى ولري.

اصلاح او انيس:
دې دولتي ورځپاڼو هم په بيلابيلو مطالبو كې د افغانستان او سيمې په روانو حالاتو خبرونه او تبصرې خپاره كړي دي.
انيس پخپله سرمقاله كې واشنګټن ته د افغان ولسمشر په سفر او له هغه په شوي تود هركلي بحث كړې او ليكلي، چې امريكا بايد د يو دوست هيواد په توګه په افغانستان كې د سولې او سياسي ثبات تر ټيګيدو پورې خپلو همكاريو ته دوام وركړي.
خو اصلاح بيا د دواړو لوريو ترمنځ شويو خبرو ته په اشارې ليكلي، چې افغانستان او امريكا به اوږد مهاله ستراتيژيكه ملګرتيا ولري.

افغانستان ټايمز:
دې انګلسي ژبې خپلواكې ورځپاڼې هم امريكا ته د افغان ولسمشر په سفر بحث كړې او د افغانستان په اړه د واشنګټن دريځ ته په اشارې دا پوښتنه كړې، چې ايا اوباما د افغانستان لپاره يو واضح پلان لري او كه څنګه؟
ورځپاڼې پخپله سرمقاله كې د نا دولتي موسيسو په فعاليت بحث كړې او ددوى كړنو ته په اشارې ليكلي، چې دا ادارې بايد د مرستو په لګولو كې خورا حساب ده وي.
ورځپاڼې خپل نننې كارټون په افغانستان كې د بيارغونې روان بهير ته ځانګړې كړې، چې تر ډيره ددغو ادارو لخوا پر مخ وړل كيږي او پكې دا ښودل شوې، چې ددوى كاري كيفيت خورا ټيټ دې.