هلمند: طالب قومندان خپل ماين وواژه

د هلمند ولايتي مقامات وايي د چارشنبې په ماخستن په دغه ولايت کي يو طالب قومندان او ساتونکى يې په خپل ماين وژل سوي دي.
د هلمند د والي وياند داود احمدي وايي ملا برهان په يوه کور کي د چاودنکو موادو په ترتيبولو بوخت وو چي ناڅاپه چاونه رامنځته سوې او له خپل ملګري سره پکښي وژل سوئ دئ.
د داود احمدي په وينا پېښه د هلمند په مارجې ولسوالي کي رامنځته سوې ده.
سره له دې چي د هلمند چارواکي ملا برهان د طالبانو مهم کس بولي او وايي په مړينه به يې په مارجه کي امنيتي وضعيت تغير ومومي، خو طالبانو لا تر اوسه په دې هکله تبصره نه ده کړې.