لراوبر ویب پاڼه لراوبر يو افغان – تازه خبرونه
افغان دولتي مقامات وايي د سې شنبې په ورځ د بادغيس په بالامرغاب ولسوالي کي د ناټو او افغان ځواکونو له خوا ٢٧ تنه طالبان وژل سوي دي.
د لوېديځ زون يوه پوځي افسر جلندرشاه بهنام رسنيو ته وويل دغه جګړه د بالامرغاب په جوى خواجه سيمه کي رامنځته سوې ده، چي څو ساعته پرله پسې يې دوام وکړ.
بلي خوا ته د ناټو ځواکونو منلې چي په هلمند ولايت کي يې د پنځو طالبانو سره څلور ملکي کسان د بمباريو پر مهال وژلي دي. د ناټو ځواکونو اعلاميه وايي پېښه د هلمند په نهر سراج ولسوالي کي رامنځته سوې چي په قربانيانو کي دوې ښځي هم شاملي دي.
خو د چين د شينهوا آژانس نن د هلمند په ګريشک ولسوالي کي د بمباريو له امله د ٢٥ ملکي کسانو د مړيني خبر ورکړئ و، چي د ګريشک ولسوال يوازي د پنځو طالبانو مړينه تائېد کړې وه. دا لا معلومه نه ده چي د ګريشک ولسوالي او نهر سراج بمبارۍ يوه پېښه ده او که په دوو جلا جلا پېښو کي ملکي کسانو ته دونه مرګ ژوبله اوښتې ده.