لراوبر ویب پاڼه لراوبر يو افغان – تازه خبرونه
ووايه زه ساز او که نغمه شمه
څنګه دې جانانه مېلمنه شمه
جوړ په تصور کې ځان پاچا کړمه
څو شېبې رنګينه شان دنيا کړمه
لاړه شم خو بېرته راستنه شمه
څنګه دې جانانه مېلمنه شمه
دا زما خزان لمبه لمبه ځواني
دا په کړاوونو اموخته ځواني
پرېمېږده قسمته چې دمه شمه
څنګه دې جانانه مېلمنه شمه
تا کړمه غزل که دې سندره کړم
ګل دې د اوربل که خال په زنه کړم
يا که سپلني غوندې لمبه شمه
څنګه دې جانانه مېلمنه شمه
وايي پښتونزۍ چې پښتنه يمه
ټينګه همېشه په دې وعده يمه
ستا د سر پټکی او که شمله شمه
څنګه دې جانانه مېلمنه شمه
