لراوبر ویب پاڼه لراوبر يو افغان – تازه خبرونه
نېشن ويبپاڼې خبر وركړى چې د افغانستان ولسمشر حامد كرزى به د چهار شنبې په ورځ پاكستان ته لاړ شي، ويبپاڼه د ډيپلوماټيكو سرچينو له خولې كاږي، چې له ولسمشر سره به د بهرنيو چارو نوى وزير ډاكټر زلمى رسول، او د كابينې نور مهم غړي هم ورسره وي.
افغان ولسمشر افغانستان ته د پاكستاني پوځ د مشر پرويز كياني تر راتګ وروسته سمدستي پاكستان ته سفر كوي.
حامد كرزى به په پاكستان كې له خپل سيال اصف علي زرداري او لومړي وزير يوسف رضا ګيلاني سره وګوري او د دواړو خواوو د اړيكيو، د هلمند د عملياتو، په افغانستان او سيمه كې د امنيتي مسئلو په ګډون به پر يو لړ مهمو موضوعاتو خبري وكړي.
خبر زياتوي چې ولسمشر حامد كرزى به همدارنګه د افغان دولت د مخالفينو د هغو مشرانو غوښتنه وكړي، چې څو اونۍ وړاندې په پاكستان كې نيول شوي دي.
سرچينې نېشن ته ويلي چې حامد كرزى به له دوو څخه تر دريو ورځو پورې په پاكستان كې وي، دا به د ولسمشر له بيا ټاكل كېدو وروسته پاكستان ته د نوموړي لومړى سفر وي.