لراوبر ویب پاڼه لراوبر يو افغان – تازه خبرونه
د پاکستان په مشرانو جرګه کي د پښتونخوا د قبايلي سيمو استازي عباس افريدي واشنګټن ته له رسېدو سره سم بيرته خپل سفر لغوه کړ.
سناتور عباس افريدئ چي څو ورځي دمخه د مشرانو جرګې له پنځو نورو غړو سره د امريکا د مشرانو جرګې په بلنه دغه هيواد ته تللى وو، د واشنګټن په هوايي ډګر کي يې د باډي سکين ماشين له تېرېدو څخه انکار وکړ او بيرته له خپلو ملګرو سره پاکستان ته راستون سو.
راپورونه وايي چي عباس افريدى، کامران خان، حافظ محمدرشيد، ساجد حسين طوري، جواد خان او اخندزاده چټان د امريکا د بهرنيو چارو وزارت په لګښت د قبايلي سيمو په هکله د خبرو اترو دپاره امريکاي ته تللي وو، او هلته يې د امريکا له ځانګړي استازي ريچارډ هولبروک، سناتور لوګر او سناتور جان کيري سره د قبايلي سيمو د روانو حالاتو په هکله خبري کړي دي.
د دغه هيئت غړي اخندزاده چټان اسلام آباد ته له رسېدو سره سم مطبوعاتو ته وويل امريکايي چارواکو ته يې په قبايلي سيمو کي د بې پيلوټه الوتکو د بمباريو شکايت وکړ او د بندېدو غوښتنه يې ځني وکړه.
اخندازه وايي امريکايانو ته يې دا هم وويل چي هلته د القاعدې کومه فعاله ډله نسته او جنګياليو ته د مقاومت وسلې د اسرائيلو د موساد او هندوستان د را استخباراتي شبکو له خوا ورکول کېږي.
امريکا د تير کال په پاى کي د خارجي پروازونو د کنټرول په خاطر په خپلو هوايي ډګرونو کي داسي ماشينونه ولګول چي د ورڅخه تېرېدونکي کس د بدن ټول غړي د کمپيوټر پر پرده لڅ ښيي.