مخالف

اقرار کې مخالف دى په انکار کې مخالف
عجيبه شان جانان دى په هر کار کې مخالف

چې ناست مې پر اوږو وي، ښه خوشاله وي قانع وي
چې کوز يې له اوږو کړم نيمه لار کې مخالف

منمه هر سړى کوي پاچا پسې خبرې
خو ما غوندې به څوک وي په دربار کې مخالف

بېګاه يې د ملا خبرې ټولې ومنلې
چې پاڅېده له خوبه، شو سهار کې مخالف

دې ټولې زمانې مې په نبض ووهلې ګوتې
يو تار يم د درې تارو په سه تار کې مخالف

زما او ستا د دين نظر اوبه دي او اورونه
ته ژوند کې مخالف، زه انتحار کې مخالف

هغه سړى سړيو کې حساب نه دى ملګرو!
چې نه لري په کلي نه په ښار کې مخالف