لراوبر ویب پاڼه لراوبر يو افغان – تازه خبرونه
ويسا:
دې خپلواكې ورځپاڼې د خپل لومړي مخ په سر كې د امريكا لخوا په قبايلي سيمو د پټو عملياتو د پيل خبر وركړې او ليكلي، چې ددې عملياتو شمير زيات شوې او د پاكستان حكومت له دې عملياتو په بشپړه توګه بې خبره دې.
ورځپانې د همدې مخ غټ سرليك د ناټو د عمومي منشي پرونيو څرګندونو ته ځانګړې كړې او ليكلي، چې په افغانستان كې د ناټو نوى حركت پيليږي.
ورځپاڼې له وسلوالو مخالفينو سره د خبرو مسئله هم راخستې او ليكلي، چې پدې اړه به د لندن له غونډې وروسته پريكړه وشي.
ورځپاڼې په دوام كې ليكلي، چې د افغانستان په اړه د لندن د غونډې اصلي تمركز هم په ملي پخلاينې دې.
ورځپاڼې پخپله سرمقاله كې بيا د بن په غونډې تبصره كړې او پوښتلي دي، چې له دې غونډې نه د خلكو هيلې څومره ترسره شويدي.
هيواد:
دې دولتي ورځپاڼې د خپل لومړي مخ زياته برخه د افغان ولسمشر او د ناټو د عمومي منشي پرونيو څرګندونو ته ځانګړې كړي او د ښاغلي كرزي په حواله يى ليكلي، چې سوله د افغانانو تر ټولو ستره غوښتنه ده او له همدې امله دوى له وسلوالو مخالفينو سره د خبرو هڅه كوي.
ورځپاڼې په دوام كې د ښاغلي كرزي په حواله ليكلي، چي كه طالبان له هيواده د بهرنيو ځواكونو وتل غواړي نو خبرو ته دې غاړه كيږدي.
پخپله سرمقاله كې په كابل كې د ناټو د عمومي منشي پرونيو څرګندونو ته په اشارې په افغانستان كې د دغه تړون ماموريت څيړلې، چې د ورځپاڼې په وينا خورا ستونزمن دې.
په ورځپاڼه كې په افغانستان كې د اداري فساد ستونزې ته هم كتنه شوې او د هغې ناوړه اغيزو ته په اشارې ليكلي، چې دا د ترورزم پياوړې كوونكې پديده ده.
راه نجات:
دې نا دولتي ورځپاڼې بيا د خپل لومړي مخ غټ سرليك د افغان ولسمشر حامد كرزي د وينا دې ټكې ته ځانګړې كړې، چې كه طالبان په مليونونو ځلې هم رد كړې دوى به د خبرو وړانديز كوي.
ورځپاڼې پخپله سرمقاله كې هم په افغانستان كې د روغې او جوړې لپاره رونو هڅو ته كتنه كړې او وسلوالو ته يى دا سپارښتنه كړې، چې د بهرنيانو د شتون پلمه پريږدي او سولې ته دې غاړه كيږدي.
ورځپاڼې د همدې مخ په يو جلا مطلب كې د افغانستان د امنيت د ملي شورا په حواله دا خبر وركړې، چې د طالبانو خپل منځي اختلافات زيات شوي او اوس دوى پخپله كې يو بل ته اړم شويدي.
اصلاح او انيس:
دې دولتي ورځپاڼې هم په بيلا بيلو مطالبو كې د افغانستان او سيمې د روانو حالاتو په اړه خبرونه او تبصرې خپرې كړيدي.
انيس پخپله سرمقاله كې په افغانستان كې د خلكو د اقتصادي ستونزو په اړه د ملګرو ملتونو لخوا خپور شوي راپور ته په اشارې ليكلي، چې اړ خلك د بيړنيو مرستو مستحق دي.
خو اصلاح بيا پخپله سرمقاله كې د افغانستان د شمال او په تيره بيا د كندز ولايت په امنيتي وضعې انديښنه څرګنده كړې او پوښتلي دي، چې امنيتي ارګانونه ددې وضع په وړاندې ولې بې پروا دي.
افغانستان ټايمز:
دې انګلسي ژبې خپلواكې ورځپاڼې پخپله سرمقاله كې په افغانستان كې د هوايي ځواك د اړتيا په موضوع تبصره كړې او ليكلي، چې پدې برخه كې بايد زياتې هڅې وشي.
ورځپاڼې په دوام كې پدې برخه كې د مرستندويه هيوادونو مرستې د ستاينې وړ بللي خو ليكلي، چې دا مرستې بايد زياتې شي.
ورځپاڼې پخپل ننني كارټون د لندن جوړيدونكې غونډه انځور كړې او پكې دا ښودلې،چې د غونډې ټول اجزا موجود دي خو معلومه نده، چې پايلې به يى څه وي.
ملي ارمان:
دې نا دولتي ورځپاڼې پخپله سرمقاله كې يو ځلې بيا په ولسي جرګه كې د لوى څارنوالۍ د مرستيال په څرګندونو تبصره كړې، چې پكې د كابينې په غړو كې د فساد موضوع ته اشاره شوې وه او ليكلي، چې مفسد وزيران دې پرته له كومې ويرې خپل كار ته دوام وركړي.
ورځپاڼې د خپل دويم مخ په يو څيړنيز مطلب كې د اسلامي نړۍ په وړاندې د امريكا روان سياستونه هم څيړلي دي.
په ورځپاڼه كې په افغانستان كې په نشه يي توكو د روږدو كسانو د روان حالت په اړه هم يو مطلب خپور شوې او پدې ترڅ كې دا خبر وركړل شوې، دا شمير په ماشومانو كې مخ په زياتيدو دې.