لراوبر ویب پاڼه لراوبر يو افغان – تازه خبرونه
عمر مې تېر شو بس همدغه انتظار کې خدایه
چې سړيتوب به پیداکېږي کله یار کې خدایه
افغان ماشوم چې شي زلمی یایې ځانمرګی واخلي
او یا یې ماین خښ وي ضرور د ښونځي لار کې خدایه
مونږه په شپه کې د چا کاڼو ته کتلي نه دي
زمونږ کانونه لوټ شوه تکه سپین سهار کې خدایه
مزدور خاوند ترېنه ځانمرګي زوی بمبار واخیستو
کونډه وړو بچو ته خیر غواړي بازار کې خدایه
ددوی قاتل ته خو هیچا هم ترهګر ونه ویل
دا پښتانه چې نن سبا مري په بمبار کې خدایه
چې پلار یې ووایي ( یرغله ) لور مې ستا په نوم شوه
څه به دې لږ شي په دا بې حده دربار کې خدایه
