زمـوږ د زمـانـې فـرعـونـان زمـوږ نـړۍ کـومـي خـواتـه بيـايـي ؟ (۱)

 د اکتوبر ۲۸ مه ۲۰۰۹ 

 لومړۍ برخه

 د ايلوميناټي، (Illuminati) » لغت دلاتیني کلمې  د  «ايلوميناره» څخه منشأ اخلي او  د روښانه کولو، پوهېدلو او پېژندلو معنی ورکوي . ایلومیناټي د آګاهانو، روښنفکرانو، منورينو، پوهانو ، اشرافيانو ، نخبګانو او سرغنه ووپه معنی ده  . په ننۍ  نړۍ کي د « اشرافيانو او نخبګانو» د  ډلي  څخه  ځينو  ځانونه  د خپلو ميليارډ ډالريزه  هستيو پرمبنا په خپل مابينځ کي  چوڼلي  او ځانونه  يې  د وتلو بني آدمانو په بڼه    د نړۍ د« واکمنانو يا اربابانو» په حيث  را مخته کړي  دي .  دهغوی هدف دادی چي د  ترټولو پخوانۍ او د ترټولو  محرمه  او مرموزه  مخفي سازمانو نوم په همدې نامه يعني « د نړۍ د اربابانو» په نامه ونوموي او هغه و ميدان ته را وباسي . په د ې سازمانو کي زيات داسي کسان سته چي په ټولنه کي  پېژندل سوي  څهرې او د هغوی هويت معلوم دی، خو د ايلو ميناټانو د سازمان  اکثره غړي  واضحاً نه  پېژندل کيږي چي څوک دي،  ولي د ځينو اشخاصو نومونه يې ياديږي  . واقعيت خو دادی چي  ددغه سازمان بدنه د لويو  سرمایه دارانو، د بانکونو او لوي شرکتونو او فابريکو  د مالکانو،   اشرافيانو او اغنياو  څخه جوړ سوی دی  . لکه  د «راتشيلډز»  کورنۍRothschilds ، «هريمنان »، «راسلانان »، «دوپونان»DuPont، «وينډسوران Windsors، «راكفلران »  Rockefellers   او ډير داسي نور . دډويډ راکفلر کورنۍ بيا پخپله د« بيلډر برګ» د ګروپ او د «بهرني سياست د شورا»  د بنسټ   ايښودونکو څخه هم  شمېرل کيږي

 د اوسنيو ايلوميناټانو، اشرافيانو يا نخبګانو د جوړښت سلسله  د کال ۱۷۷۶ څخه را شروع سوې  او دهغه وخت راهيسي يې د نړۍ د تسلط او ادارې د پاره  په نغم کي  اوبه   کيندلي  دي .هغوی ځانونه  د پخوانيو ايلوميناټانو په نامه ياد وي  . ويل کيږي چي په هغه وخت کي د «  آدام وايسهاوپت»   (Adam Weishaupt)په نامه يوه  مسيحي  د آلمان په  باوير  کي دغه فرقه تاسیس کړې وه  . په دې  دوران کي د «ايلوميناټانو»  هدف مترقي صبغه درلوده، د سلطنتي نظام د واکمنۍ   له مينځه وړل  وه.  هغوی  په دې توګه  غوښتله  چي  ددې نظام په ضعيفه کولو  سره و نړۍ ته د ترقي  او بنيادي بدلونو   لاره هواره او هغه خنډونه ليري کړي چي ددې نظام لخوا  د ټولني  د پرمختيا او د مترقي افکارو  د پراختيا  په وړاندي  ايښودل سوي   وه .  ويل کيږي  چي د دوی د مترقي وجهي له رويه  د فرانسې لوی  انقلاب او د امريکا د بنسټ ايښودلو کار هم  د دوی  د اسټراتيژيو  ثمره وه او دهغوی د ايډيالونو نه يې الهام اخيستی وو .

 د دغه  «نخبګانو» له نظره، سياسي ډيموکراسي يوازي يوه « وسيله» ده او په هيڅ ډول  يو « هدف»  نسي ګڼل  کېدای  .  هغوی داسي فکر کوي چي ولسي عامي  پرګنې په طبيعي توګه جاهلان او احمقان دي چي تند خويه  مزاج  لري  او ډېر ژر د حاله وزي  ، له دې بابته نړۍ نه يوازي داچي  بايد د وتلو پوهانو، نخبګانو او روښنفکرانو لخوا چي د ميليارډرانو په خدمت کي به وي  رهبري  سي،  بلکه  ددغو اضافي انساني جميعت  چاره هم بايد وسي  .  د وخت په تېرېدو  سره  د دغه ډلې غړي  د «ورانوونکو  تؤطه ګرانو» څخه  و « بې رحمه سلطه ګرانو» ته را  واوښتل او اصلي هدف يې د قدرت  ساتنه او پر ولسو باندي د خپل ظالمانه  حاکميت  ټينګېدنه وه .

 د «ايلوميناټي» د ډلي تأسيس ،  په واقعيت کي د يوې داسي اقتصادي طرحي د اجرا کېدو آغاز وو چي  د څو پېړيو په موده کي بايد  د يوه نوي مالي نظام د کنټرول د لاري پر نړۍ باندي  خپل  ځان  حاکم کړي . هغوی په دې توګه غوښتله  ترڅو د څو نسلو په تېرېدو سره  و راتلونکو ته دغه لاره په ميراث پريږدي . دوی په نظر کي لرله چي د موروثي نخبګانو په څير  دبشر د  تکنالوژيکي، ټولنيزو او اقتصادي پرمختياوو او لاسته راوړونو مهار   په خپل  لاس کي  ونيسي او   پر ټوله نړۍ باندي   خپله بابايي تثبيت  او  د خپلي  يک لوختي  سلطې  مفکوره عملي کړي .

 په نړۍ کي چي د نورو   اربابانو و سازماني رېخت ته څوک ګوري ، نو دهغوی نه خلاف، ايلوميناټان يوازي  يو ساده  د  « ژور تفکر »  منبع يا د «رسوخ  د شبکې» مرجع  نده، بلکه هغوی  داسي يو سازمان   جوړ کړی دی چي د هغوی واقعي ماهيت  بلکل مشکوکه، محرمه او اسرار آمېزه ساتل سوی دی . د هغوی سياسي او اقتصادي رهبران و خلکو ته د منطقي، علمي او مترقي اشخاصو په څېر معرفي کيږي، خو که خلک په دې و پوهيږي چي د دغه اشخاصو زياته برخه د پردې تر شا او د مځکي لاندي په څه  پټو شيطاني او مرموزه د ريا کارۍ او فريبکارۍ کردارو باندي بوخت دي،  په  څه  عجيب و غريبو کارو لاس پوري کوي ، څرنګه د خپلو شيطاني اهدافو د پاره دمختلفو خدايانو عبادت  کوي،  او څه  شوم نيتونه په مغز کي لري ،  نو هغه وخت به  د هغوی  ابليسانه  کړو ته  هر څوک   هېښ  او ګوته په غاښ کي پاتي  سي .

 پخواني او نني ايلوميناټان  چي  دلويو سرمايه دارانو او ثروتمندانو څخه جوړدي،  ځانونه داسي انګېري،  چي هغوی د شيانوپه  ماهوي پېژندنه کي د يوې  برتري پوهي او خاص  کرامت   خاوندان دي  او   دا شاني وړتيا یې د ليرو زمانو څخه ور ته په ميراث  پاتې ده .  يعني داچي هغوی په عمل کي ثابته کړېده څرنګه ګټه وکړي او څرنګه د بشريت پر طبيعي  شتمنيو لاس  تېر کړي  او  څرنګه د ولسونو دزحمتو  ثمره  و ځانته را کش   کړي .  هغوی  د داسي يوه  «صفت» په  درلودلو سره  و ځانته    حق ورکوي  چي پر بشريت  باندي  د فرمان چلولو مشروعيت  لري .!

 نني ايلوميناټان  د يوه  مخفي سازمان  په توګه د پردې ترشا د يوه  نړۍ وال دولت په حيث عمل کوي . هغوی د نړۍ پيښي د خپلو لاسپوڅو دولتو او د خپلو لويو مالي شرکتو، بانکو او کمپنيو لخوا کنټرولوي او غواړي د لانجو او جګړو په رامينځته کولو کي نړۍ په خپل مابين کي سره ووېشي او د    ددوی په اصطلاح د « يوه  نوي نړۍ وال نظم» په لوري پر هغه باندي تسلط پيدا کړي    .

 د ايلوميناټانو ددغه داعيې نُماد د امريکې  پر يو ډالري نوټ باندي  ښه ترها   منعکس سوی دی . په دې نوټ کي دغه  څه د يوه  داسي هرم  په  شکل  ځان ښکاره کوي  چي ( د برګزيده ګانو او نخبګانو) د  کلا پر سر  د پوهاوی د يوې داسي  روڼي  سترګي  لخوا تمثيليږي ،چي تر شا يې نور ځليږي  او  د هرم   پر بازوګانو باندي   چي وانسانانو ته ورته  د پخو خښتو څخه جوړ  سوی دی ، تسلط لري .

 

پر دغه يو ډالري  لوټ باندي دوې څرګنده  يادوني يعني د  «نووس اوردو سكلوروم»  (NOVUS ORDO SECLORUM) کلمې هم  ليدل کيږي  چي  ډيري مانا داره اشارې دي . دغه اشارې  (د پېړيو يا ابد دپاره د نوی نظم) د بقا مانا ورکوي، يا په بل عبارت د همدغه اوسني  په اصطلاح  د «نوی نړی وال نظم » New World Order (NWO)  افاده منعکسوي .   د «آنوئيت سوپټيس» (  ANNUIT COEPTIS)  کلمې  هم چي « زموږ  طرحه به بريالی سي » په معنی ده،  په واقعيت کي دا  هغه طرحه  بيانوي چي ددوی په فکر   نن د خپل  وروستي پړاو څخه چنداني فاصله نلري .

  ايـلومينـا ټـانو او د هـغـوی د  نـړيو ال دولـت څـرنـګـوالـی

ايلوميناټان چي يو شيطاني سازمان بلل کيږي  مشري يې  يهودي الاصله  الماني  د «راتشيلډز» (Rothschild)  (۱) کورنۍ په غاړه لري  . ددې سازمان  په بطن کي نور فريماسونونه، او د نورو انجمنو او مؤسسوغړي هم  ليدل کيږي .( فريماسون يعني   د يوې عقيدې او تجربې  دلارويانو په مابين کي يووالی ) . دغه سازمان  يوه  پراخه بدنه لري چي په هغه کي سياسي او مالي چاري  او ديوه نړۍ وال متحد دولت د جوړېدو  طرحه  پرته ده . دغه سازمان  هر هغه  څه چي په توان او قدرت کي لري د يوه جهاني دولت د جوړېدو د پاره هغه  کاروي،  ولو که دا کار  د دريمي نړۍ والي جګړې  د شروع کېدو باعث هم و ګرزي . د دغه  هرم شکل په لاندي ډول هم تشريح کېدای سي :

 –  هغه سترګه چي هرڅه ويني :  دغي  سترګي ته د شيطاني   سترګي په حيث کتل کيږي  ؛ لارښود روح  او  په دننه کي د لارښووني نهاد  .

 –  آر ټي (RT) : د  را ټشيلډز کورنۍ ، يا په بل عبارت  د را ټشيلډ عدالت او محکمه ددې کورنۍ دايلوميناټانو  يا نخبګانو لخوا اجراء کيږي ، هغوی  ځانونه د خدايانو تجسم ګڼي او د هغوی  کلام  ته د قانوني  حکم په توګه   ارزښت ورکول کيږي .

 –  ۱۳ کسيزه شورا :  دغه شورا د لويو « راهبانو» شورا ده  چي ديارلس لوی راهبان لري،  او  د را ټشيلډز  رهبانيت او دهغه  شخصي مذهب جوړوي  . 

 –  ۳۳ کسيزه شورا: د سياست، اقتصاد او کلیسا  په  برخو کي د نړۍ د   ترټولو لوړ فريماسيونو څخه جوړه  ده  . دغه کسان د « ۳۰۰ کسيزي کميټې»   لخوا د  انتخابي  نخبګانو په حيث ياديږي .

 –  ۳۰۰ کسیزه کوميټه : دغه کميټه په کال  ۱۷۲۹ کي د نړۍ د بانکي او تجارتي چارو د تنظیم په خاطر د انګلیس د شرقی  هند د تجارتی کمپنی (Company  (British East India Merchantيا BEIMC   لخوا د   ترياکو د قاچاق څخه  د ملاتړ په خاطر تاسیس سوې  وه .  ددې ۳۰۰ کسيزي کميټې  مشرتوب د انګليستان د سلطنتي  کورنۍپه غاړه دی . نوموړې  کميټه د ټولي  نړۍ د بانکو د  سراسري سيسټم  دنماينده  په حيث پېژندل کيږي .  هغوی  د غربي هيوادو د نمايندګانو په مابين کي تر ټولو زيات  اهميت لر ي  . ټوله بانکونه د را ټشيلډ د کورنۍ د لاري د دغه «۳۰۰ کسيزي کميټې  » سره اړيکي نيسي . ددې کمېټې د ځينو اهم او پېژندل سوي کسانو څخه دغه اشخاص يادېدلای سي  :  لوی «جورج بوش»، «لاړد چمبرلن»، د «فوربس» کورنۍ، د ډنمارك پاچا « نهم فريډريك » ، «جوړج لويډ»، سړ «اډوارډ هيګ»، «سړ  ډوګلاس هړيمن»، «هنري كيسينجر»، «فرانسوا ميټران»، «اولاف پالمه»، شهزادګۍ «بئاتريكس»، شهزاده «رنيه» موناكو، ملكه « دوهمه اليزابته »، ملكه «جوليانا»، «ډيويډ راكفلر»، بارون «راتشيلډ»، كارډينال «تيسن بورنميسزا»، بارون «هانس هاينريش واندربيلت»،  د  «فون فينك، بارون» کورنۍ  اګوست فون هابزبورګ»  او..…

 نـړيو ال  يـا جهـانـي دولـت

د څو لسيزو راهيسي څو ملتيزه شرکتونه د نړۍ د اقتصادي ژوند په يوه غوښنه برخه تبديل سوی دی .څو ملتيزه » شرکت په واقعيت کي د څو شرکتو يوه پراخه  مجموعه ده چي په زياتو هيوادو کي د خپلو شعباتو لخوا ځان غځوي . د هغوی د عمل ميدان په يوې ځانګړي جغرافيايي سيمي پوري نه محدوديږي بلکه ټوله نړۍ په برکي نيسي .

 

دغه شرکتونه کله کله ان ريکارډ ماتونکي بعدونه نيسي او ډېري داسي بېدرکه ګټي و خپلو حسابو ته را کشوي  چي حتی اغلباً د ځينوکوچنيو او لويو هيوادو د نا خالصه توليداتو څخه لا هم زيادښت کوي . هغوی په دې توګه د سياسي پلوه د يوه با قدرته  او نوي  عنصر په  حيث ځان ښکاره کوي . دغه څو ميلتي لوی شرکتونه په واقعيت کي د جهاني کېدو اصلي   عاملان او د نړۍ د اربابانو په کتار کي ځان حسابي .

 د مخ په زواله دولتونو(هيوادونه او ملتونه)  په عوض کي چي د همدا  اوسه څخه د  يوه نوی قدرت  په بڼه ځان  متجلي کوي  او جهاني بڼه نيسي، دغه  قدرت  د ډيموکراسۍ د چوکاټه څخه ځان راباسي  . په دې بهير کي پراخي پرګنې په داسي حال کي چي د واقعي قدرت و نويو مرکزونو ته ځان  ليږي ،  همداسي د ملي نهادو په انتخاب پسې  هم   لالهانده ګرځي  . په بل عبارت  نن دمځکي کره   لا د پخوا څخه   د جوړسوي څوملتيزه شرکتونو، سازمانو او نهادو څخه چي اجرائيوي او سياسي نقش لري، اداره کيږي . دغه شرکتونه ،اجرائيوي سازمانونه او لوی نهادونه  خپل ځان  د قدرت  پر  دريو برخو چي  يو په بل کي اخښل سوي دي،  وېشي . دغه برخي ، لومړۍ د اقتصادي او مالي قدرت  سلسله ده، دوهم د پوځ او پوليسود قدرت  سلسله ده  .، او دريم يې  د علمي قدرت  نهادونه دي  .

 ددې نظام  سياسي قدرت، ددې طبقې د سازمانو د څلورمي  ردې  لخوا اجراء کيږي ، او هغه  د  ژور تفکر  او  د رسوخ د شبکو څخه عبارت دی چي په هغه کي    د نړۍ د  لېډرانو (Global Leaders) ډله  لکه د« بيلډر برګ»  او يا د «داووس» د نړۍ واله اقتصادي   ډلي، اهم ځای لري   . دغه ټوله سازمانونه په خپلو کي سره پېيلي او یو دبل مکمله اجزاوي دي، خو په خپل مينځو  کي هيڅکله هم رقابت نلري . هغوی په واقعيت کي د ځان څخه داسي يوه مجموعه جوړه کړې ده چي  انسجام يې  د ځينو داسي شخصیتو لخوا تأمينيږي چي د نورو سازمانو غړي دي  . داسي تلاښ کيږي  چي دغه کليدي اشخاصوته   «د نړۍ اربابان يا واکمنان »  وويل سي  ،لکه لوی جوړج بوش يا هنري کسینجر، زبينګو بريژنسکي ، او نور، چي د لوړ کچي سياسي لېډرانو په جمله کي  راځي ، خو  ددې   ډلي  لويه برخه  تل د عادي خلکو څخه   پټ  او ناشناخته ساتل کيږ ي .

 دد غه  سازمان نظم په خورا نبوغ سره  سکښت سوی دی ، په دې معنی چي د دې سازمانو  زياته  برخه  چي يو شبکه ای جوړښت لري،د  يوه  واحد ماموريت او مسؤليت په درلودلو سره خپله وظيفه پرمخ بيايي .  يعني  که ددې سازمانو يا ارتباطي کړيو څخه يو  بې اثره  سي  يا  د کاره ولويږي، نو د ټولو برخو کنټرول تر تهديد لاندي  نه راولي  . درست لکه انټرنټي شبکه چي يو بې مرکزيته نظام دی او په هغه کي  د اطلاعاتو جريان  کولای سي د يوه خراپ سوي ځايه څخه په آساني سره بيرته خپل   سر د بلي خوا  څخه «را وباسي»  .

 د ايـلومينـا ټـانو د سـازمانـو اجـرائيـوي  بنيـادونه  :

داروپا د همکارۍ او اقتصادي  ودې سازمان  ( OCDE  يا OECD) : د نوي فرا اټلانټيک د بازار سازمان ورکوونکی (AMI يا MAI) دی ، چي  د تجارت د راکړي  ورکړي  مقررات او قوانين ټاکي  او د نيژدې څخه  د غربي هيوادو  پر اقتصادي سياست باندي  اثر اچوي . دغه سازمان د نړۍ دېرش پرمختللي هيوادنه  چي د« بازار د اقتصادي اصولو» څخه  پيروي کوي، په خپل ځان کي را غونډ کړي دي .

 دنړۍ وال وجهي صندوق او نړۍ وال بانک(FMI يا IMF) : دغه دوه عمده  د مالي  اقتصاد او د مځکي د ژوند د چاپيريال  قدرتمنده نهادونه دي چي په مشروطه توګه  لوی رقم  پورونه د هغو هيوادو  په واک کي ايږدي چي بايد  يو ليبراله اقتصادي سیاست پرمخ بوزي  او هغه  هم بايد  د انساني او اکولوژيکي واقعيتو په زيان تر اجرالاندي ونيسي .

 د نړۍ وال  تجارت سازمان(OMC يا WTO):  دغه سازمان د نړۍ تجارتي مقررات پخپله تعيينوي او   پر تجارتي معاملاتو باندي د نړۍ د هيوادو  اختيارات نه يوازي  محدودوي بلکه  د هغوی د  مستقلانه  پريکړو صلاحيتونه  هم   ځيني اخلي او يا يې  کموي .

 د اروپا کميسيون، چي د بروکسل د کميسيون په نامه  هم ياديږي  :  دغه کميسيون  د اروپايي اتحاديې دولت دی . ددې کميسيون غړي نه ټاکل کيږي  او خلک يې هم  هيڅکله  د هغوی  د پريکړو د نتيجو څخه نه خبريږي . د هيوادو دپر مخ  زياتيدونکی قدرت زيات اړخونه  و دغه  « کميسيون» ته چي تر هيڅ رازي ډيموکراټيک کنټرول لاندي نه راځي  ،سپارل سوي دي . يعني د اروپايي اتحاديې په  غړو هيوادو کي   چي کوم قوانين تر  اجراء  لاندي  دي  ، نو  په سلو کي يې اتيااروپايي قوانين دي .

ددې نه علاوه  د اروپا کميسيون  مطلقاً د صنعتي لابيانو تر نفوذ لاندي  دی چي   د اروپايي قوانينو او مقرارات  تابع او د هغوی نه   الهام اخلي . د اروپا  سياست  « د اروپا د ګردي مېز(European Round Table) » د نيژدې همکارۍ د لاري ټاکل کيږي  ، دغه سياست  د اروپا د څو ملتيزو لويو شرکتو نو ټوله مشران سره يوځای کوي   . د «اروپا ګردی مېز »  په ټولو  اقتصادي، مالي، ټولنيز او د ژوندانه د چاپيريال  د پرېکړو په جريان کي  برخه لري  . زیاتره  ا روپايي کميسران  د څو ملتيزه شرکتو او د هغو شبکو سره چي د ليبرالیزم او جهاني کېدو تر نفوذ لاندي دي، تړاو لري .

 د بلي خوا، د اروپا يو زيات شمېر اروپايي کوميسران د «بيلډر برګ»  د باقدرته ډلي د غړو د څخه دي . چي :  «خوزه مانوئل باروسو» ( د اروپا د کميسيون اوسنی  رئيس  او د پرتګال پخوانی صدراعظم)، «فريټز بولكشټاين» ( د اروپا کوميسر، او د « بولكشټاين د قانون» بنسټ ايښودونکی)،«رومانو پرودي» ( د اروپا د کميسيون پخوانی رئيس او د ايټاليې پخوانی صدراعظم)، «ژاك سانټه» ( د اروپا د کميسیون  پخوانی رئيس او د لوکزامبورګ پخوانی صدراعظم) ،  «ليون بريټن»  (د کميسيون مرستيال او په اروپا کي  د« ګاټ» پخوانی مذاکره کوونکی)،«اديت كرسن» ( د اروپا د کوميسون پخوانیی غړی، د فرانسې پخوانی صدر اعظم او د سوداګری وزير ،د «اشنايډر» د مديره هيئت  پخوانی غړی)، «اما بونينو» ( د ايټاليا دسنا اوسنی مرستيال، د رومانو پروډي په دوهم دولت کي  د اروپايي چارو  او د بهرني تجارت پخوانی وزير )، «ماريو مونتي» د ميلان د « بوکوني» پوهنتون رئيس، بلژيکي«هانس وان دن بروك» ،  د فنلينډ د بانک رئيس او ددې هيواد د مرکزي بانک د مديره هيئت غړی «اركي ليكانن» ،ډنمارکي سياستپوه «ريت بيرگارد» او ….. د هغوی په جمله کي راځي  .

 دجهاني اقتصادي  مجمع  (World Economic Forum) : دغه  سازمان  يو غير دولتي سازمان دی چي پخپل نهاد کي يې  د مځکي د کرې تر ټولو قدرمند ه او ترټولوثرومنده د سرمايې خاوندان    را ټول کړي دي .   دغه غونډه هر کال   د هغه د جوړېدو په  ځای يعني د سوئيس  د ښکلي  هيواد د  داووس په کلي کي جوړيږي . ځکه يې  د داووس په نامه شهرت پيدا کړی دی . داووس د پخوا څخه  د نړۍ د ثروتمندانو او اغنياوو  د ساعت تېری او تفريح  ځای  وو او اوس هم دی  . دغه بنياد په کال ۱۹۷۱ کي  د کلاوس شواب لخوا چي د تجارت او سوداګری په برخه کي  استاد وو تأسیس  سو .

 په دې شبکه کي   د منلو لومړنۍ معيار ثروت او قدرت دی، او عمدتاً  د  هغو  شرکتو ومديرانو ته بلنه ورکول  کيږي چي کلنی عايد يې د  يوه ميليارډ ډالرو څخه زيات وي ،  ددې  غونډي د رئيسه هيئت غړي  زياتره د امريکا او اروپايی هيوادو څخه دي، خو د ځينو  آسيايي  د صنعتي هيوادو استازي هم ګډون پکښې لري .  د غړيتوب هر  کانديد باید په اقتصادي برخه کي، دنړۍ وال سیاست په عملي عرصه کي، په تکنالوجيکي يا د رسنيو په ميدان کي ښه پوره نفوذ ولري .

 دغه غونډه په ريکارانه توګه داسي تظاهر کوي چي ګني دوی د نړۍ د راتلونکي نه تشويش لري حال داچي هغوی د خپلو قطبي او غول پيکره مالي شبکو د لا چاغولو په سوچ کي دي .  په واقعيت کي دا دوی دي چي  د خپل حريصانه او ظالمانه  سياست په پلي کولو سره د نړۍ  د حاد اقتصادي مشکلات په وجه و وحشتناکه حالت ته مخه کړېده او په خواشینوونکي ډول  يې عملاً دفقر ، لوږي ، ناجوړيو او بېکاريو باعث ګرځېدلي  او په میلیارډو انسانان يې  دهغه  سره لاس او ګرېوان کړي  دي . همدا اوس يو ميليارډ انسانان د همدې سرمايه  درانو  د شامته په نړۍ کي په وږي نس شپه سبا کوي ، د هغوی د خولې ګوله همدغه اشخاص غصبوي . همدا اوس   په نړۍ کي دورځي پنځه دېرش زره تنه د لوږي څخه مري .

  د نړۍ دغه اقتصادي  مجمع  هر کال د جنوري مياشتي په پاي  کي د سوئيس په « داووس » کي جوړيږي  .

 درې اړ خيزه کميسيون : دغه د  ژور تفکر يو نړۍ وال نهاد دی چي اساس يې په کال ۱۹۷۳ کي د«ډيويډ راكفلر» او د پخواني جمهور رئيس جيمي کارټر  د مشاور،«زبيګنيو برژينسكي» لخوا په ګډه ايښودل سوی دی . دغه نهاد د اقتصاد درې عمده سيمي يعني شمالي امريکه،لوېديځه اروپا او جاپان سره را غونډ کړي دي .

 د بهرنيو اړيکو شورا (CFR) :

د غه شورا يو امريکايي سازمان دی چي د لوړ کچو سياسي او اقتصادي رهبرانو څخه جوړه ده لکه: لوی جوړج بوش، هنري کيسينجور او يا د بهرنيو اړيکو د شورا رئيس ډيويډ راکفلر . دغه شورا بهرني استازي هم لري لکه د فرانسې پخوانی صدراعظم ميشل روکارو، د المان پخوانی د ماليې وزير «اتو لامسدورف»، د کاناډا پخوانی صدراعظوم «براين مالروني» او يا د «هولينګر» د مطبوعاتي ډلي رئيس لارډ «كانرد بليك» .

 د بيلډر برګ ډله  ( Bilderberg Group ) :

د بيلډر برګ ډله يا ګروپ يو غير رسمي کنفرانس دی چي  اساس يې   په کال ۱۹۵۴ کي  د هالينډ و آرنهيم ته نيژدې  د بيلډر برګ  په هوټل کي  کښېښودل سو .  ددغه ډلي  غړي چي د يوه سره انتصابي دي  او  شمېره يې د ۱۲۰ کسانو په  شاوخوا کي دی ، هر کال د نړۍ په يوه  ځای کي په پټه او محرمه توګه  راټوليږي . د بیلډربرګ   په دغه ډله کي   د نړۍ  تر ټولو قدرتمنده،   بانفوذه او ثروتمنده اشخاص را ټول دي  چي د نړۍ  و راتلونکي سرنوشت  ته  د ځان په ګټه تؤطيې  جوړوي . د  « د بيلډربرګ ثروتمنده ډله » د نړۍ د ټولو هيوادو څخه چي په  سياسي ، اقتصادي، مالي  او د رسنيو په برخه کي وتلي کسان وۍ او همدارنګه د پوهنتونو استادان ،دانشمندان او پوهان   را ټولوي  او د هغوی څخه ددې ډلي   د قدرت پر شبکو باندي  د هغوی  پر نظرياتو   باندي  څېړنه کوي . خو د اشخاصو نومونه او دبحث مواد يې په مطبوعاتو کي نه خپريږي.  زياتره د نړۍ د غربي هيوادو  د سلطنتی او پاچاهي کورنيو غړي ددې ډلي غړي دي .

 د « بيلډربرګ ډله چي د«ډيويډ راكفلر»   لخوا يې بنسټ ايښودل سوی دی  » نن  د پردې تر شا « نړۍ د واقعي دولت » په توګه عمل کوي .

 د« بيلډربرګ»  په ډله کي د ،آمريكا، كاناډا، انګلستان ، فرانسه، بلژيك، سوئيس، هالنډ، آلمان، اطريش، ايټاليا، هسپانيا، پرتګال، ناروي ، سويډن ، ډنمارك، فنلينډ ، لوكزامبورګ، ايرلنډ  او يو زيات شمېر نور هيوادونه، غړيتوب لري .

 د نـړۍ اربـابـان څـوک دي ؟

هغه  کسان چي پر ټوله نړۍ باندي د بابايي نيت لري او غواړي چي  د « نړۍ د اربابانويا واکمنانو»په نامه چي زموږ خلک و هغوی ته فرعونان وايي  ،يادسي    دا خلک بايد څوک وي ؟ کېدای  سي  چي  وويل سي  د هغوی  د تندي او مخ   په  خطو کي ګډي ځانګړتياوي او وړ شانته  نښانې   ليدل کيږي .  دغه نښانې  لکه :   حيله او تذوير،  تدبير او بې حده  هوښيار توب، بېرحمي، سنګدلي او درندګي، ټينګ عزم، وقاحت او بې شرمي، د اخلاقي مسائلو سره بې حده بې تفاوتي او په دې  چي هغوی د نړۍ د نخبګانو په ډله کي ځان ګڼي  او يا ګڼل کيږي او د هرم د سره  څخه د نړۍ ننداره کوي نو د هغه څخه  خورا زيات  خوند اخلي      .

 د نړۍ ددغه پخپل سر جوړ سوي اربابانو  په کتار کي چي د فرعونيت لاره يې غوره کړېده  دغه لاندي کسان ليدل کيږي :

 «هنري كيسينجر» ( د «نيكسون» د دوران د بهرنيو چارو وزير، او د «كيسينجر آسوشيټس آي ان اس، رئيس)، «جورج بوش» پلار (د آمريكا پخوانی جمهور رئيس ،  او په ۱۹۷۶ ـ ۱۹۷۷ کلو کي د سی آی اې يا د « سيا» د مخفی سازمان  رئيس ، «فيليپ ژافره» ( د «الف» پخوانی رئيس ، او  «كرديت آګريكول» بانک عمومي رئيس )، «جوواني آنيلي» ( د «فيات» رئيس)، «ميشل كاندوسو» ( د نړی وال  بانک  ، او د فرانسې د بانک پخوانی رئيس )، «ژان كلود تريشه» (د فرانسې د بانک  او د مركزي اروپا د بانک رئيس  )، «جوليو آندريوټي» ( هغه څوک چي دېرش کاله يې پر ايټاليا حکومت وکړ او د اويايمي لسیزي په اوږدو کي يې  په مافيا پوري اړوند زياتو رسوايیو کې او  د ښي افراطي  فريماسيونو په بم ګزاريو کي يې لاس درلود )، «هيلاري كلينټن» (په سنا کي د ډيموكرات ګوند سناتوره  ، د آمريكا اوسنۍ د بهرنيو چارو وزيره او د «بيل كلينټن» مېرمن)، «ټوني بلير» ( د انګلستان پخوانی صدر اعظم)، «جيمز ولفنسون» ( د نړۍ وال بانک پخوانی  رئيس )، «ډيويډ راكفلر» ( د «چيس منهاټن بانك رئيس »)، «بيل ګيټس» ( د مايكروسافټ رئيس)، «فرانټس فرانيټسكي» ( د اطريش پخوانی صدراعظم)، «هيلمر كوپر» ( د آلمان د «دويچه بانك»  د مديره  هيئت  رئيس)، «زبيګنيو برژينسكي» (  د بهرنيو اړيکو د شورا غړی او امريکا د پخواني جمهور رئيس جيمي کارټر مشاور )، «پاسكال لامي» (كميسر د کميسر او د «AMI»  سرسخته طرفداره )، «جوليو ترمونټي» ( د ايټاليا د ماليې وزير، او د «فورتزا ايټاليا» نماينده ،  «برلوسكني» ګوند). «موريس ليپنز» (د «فورټيس بانك» رئيس) او…

د لومړۍ برخي پای 

  

ياداښتونه :

 (۱) راټشيلډ (Rothschild )، الماني الاصله  يهود  وو  چي  د ټولي  اروپا د لويو با نک لرونکو  په  مشهوره کورنۍ پوري تړلي دي   .  دد ې کورنۍ مشر د ۱۷۴۴ په فرانکفورټ کي زېږېدلی وو . نن د هغوی نوم  په يوازي توګه د افسانوي ثروثمندانو د ډلي  سره  مترادف دی  . د روتشيلډز دوامداره برياليتوبونه تر دا اوسه پوري  د دې کورنۍ د پټو ښاخو سره د همکاري  او په  خورا لويو پانګه اچونه کي د هغوی د وړتيا او مهارت پر اصل باندي ولاړ دي .  هغوی په لومړي سر کي صرافان او سود خواره وه چي د ناپليون  د ظهور او دهغه  د جګړوڅخه يې  بې حد  استفاده وکړه .  هغوی ډير ژر په  اروپاکي د راتلونکي توفاني پيښو  مسیر درک کړ  او د جګړو په اوږدو کي يې د  جګړو  د ښکېلو و هري  خوا ته بېدرکه پورونه ورکړل او په لوړه کچه  سود   به  يې  تر لاسه کول . 

 

دغه کورنۍ  کلونه کيږي په ټوله نړۍ کي د افسانوي ثروتمندانو د سمبول په توګه پېژندل کيږي  او په ټوله نړۍ او خاصتاً اروپا کي د لوی  قدرت، او  زیاتو اطلاعاتي با نفوذ ه شبکو خاوندان دي .

 

نن د روتشيلډز د کورنۍ  او دهغوی د اهل و نسب  شمېره  خورا زياته ده ، د همدې کبله هغوی ته د روټشيلډز شبکه  وايي . د اروپا تر ټولو لويي د بيمې کمپنۍ، په اروپا کي د ريل ګاډيو غټي شبکې، د رويال داچ شيل  کمپنۍ،دکانکوړډ طيارو حوړولو فابريکې  او د نړۍ تر ټولو لوي شرکتونه او د وسلو جوړولو فابريکې  ټوله يا  ددوی دي او  يا داچي  دوی  يې تر ټولو زيات  سهم لرونکي دي . د روتشیلډز نوم نن د امريکا د راکفلرانو دنامه سره چي په مينځني ختيځ او روسيه کي د تيلو د استخراج د مخکښانو څخه دي شهرت لري  .

 اخځونه  :

مونډياليزېشن، لودووار- سايبرسوليدر، -سيتي نت- پورتاي آلبر- آلټرنیف، ايلوميناټي، سټراټيژيک رويو  او د ويکي پيډيا ويب پاڼيhttp://en.wikipedia.org/wiki/Bilderberg_Group

  ددوهمي برخي لپاره دا ځای کليک کړی