لراوبر ویب پاڼه لراوبر يو افغان – تازه خبرونه
د پلرونو په ميړانه مه نازيږه
دغيرت نښې ښکاره کړه په میدان کې
د سیالانو سره سيال شه راپاڅيږه
خپل هنر عقل ښکاره کړه په میدان کې
پلار ګټلې خوړل زوی ته وي اسانه
همت وکړه اوپخپله يې پيدا کړه
يو ځل وګوره نړۍ غيرتي ځوانه
د غيرت غيرت ويل ځانته مانا کړه
ځان خبر کړه د پلرونو له زمانه
د ژوندون په طریقه دې ځان اشنا کړه
بې سنجشه بې مفهومه مه غږيږه
د جرګې تميز پيدا کړه پخپل ځان کې
د جامو ټوکر دې کوم ځان نه راغلی
راته وښايه هنر او لياقت خپل
دا پټکی چې دې په سردی چا اوبدلی
کوم چې ته يې غرور بولې د ملت خپل
د ګنډلو ستنه نه شې جوړولی
ورور وژلو ته بيا وايې شجاعت خپل
سر راپورته کړه له خوبه راويښيږه
نور غفلت ليدلی نه شم په افغان کې
که غيرت لرې نو وګوره دنيا ته
خپل ټوټه ټوټه وطن ورسره سم کړه
د خيرات لاس دې نيولی دی هر چاته
د ټوپک پر ځای راپورته نور قلم کړه
له تورتم جهل نه ووځه رڼا ته
افغاني همت ښکاره په ټول عالم کړه
بيا نو نرزوی د پښتون يې پرې نازيږه
سرلوړي دې په نصيت شه هر ميدان کې
چې په دې نه شې خپه حوصله وکړه
ما د زړه له درده وکړې دا خبرې
د نیکۍ په کار کې تل عجله وکړه
په خبرو کې مطلب نه مه ځه لرې
په هر کار کی په تد بير فيصله وکړه
خوښي نه شي درکولی مرغلرې
که خوښي غواړې مکتب ته روانيږه
د بخت ستوری به دې پورته شي آسمان کې
څوک چې علم پوهه نه لري ړانده وي
ټول ژوندون يې په کړاو باندې تيريږي
په هر کار د بل محتاج او پسمانده وی
تل د نورو له دباو لاندې اوسيږي
مشر کشر يې د نورو نشانده وي
بې خبره وروسته وړاندې پاتې کيږي
په ټينګ عزم مخکې درومه مه ودريږه
بې ننګي نشته پښتون د بچي شان کې
زه چې ګورم پر مختګ د نور جهان ته
په يواولی اتفاق کوي کارونه
په علميت پوهه روان دي پاس آسمان ته
انټرنيټ او کمپيوټر يې مثالونه
خو چې ووينم پښتون او لوی افغان ته
په وژنه د خپل ورور کوي وياړونه
اوس نو ته قضاوت وکړه وګړيږه
څوک به لوری ورکوي پاتې کاروان ته
له جامو تر کور سامان او خوراک پورې
مونږ له نورو هيوادونو نه راغواړو
د خپل ورور د مرګ وژنې تر ځواک پورې
مونږ له لويو قدرتونو نه راغواړو
د صابون ستنې خولۍ او مسواک پورې
چې له نورو وطنو وي مونږ پرې وياړو
سترګې خلاصې کړه له ځانه وشرميږه
خدمتګاره خجالت يم دې ميدان کې
