لراوبر ویب پاڼه لراوبر يو افغان – تازه خبرونه
په كابل كې خپريدونكو ورځپاڼو نن هم تر ډيره له انتخاباتو او امنيت سره تړلي مسايل راخستي او له بيلابيلو اړخونو نه يي څيړلي دي.
په كابل كې د ازادۍ راډيو همكار حميد مهمند دا ورځپاڼې لوستي او په لاندني مطلب كې يي رانغاړلي دي.
ويسا:
دې خپلواكې ورځپاڼې د خپل لومړي مخ په سر كې د افغان ولس پر وړاندې د ځينو امريكايي چارواكو دريځونو ته كتنه كړې او په ملګرو ملتونو كې يي ددغه هيواد د پخواني سفير په حواله ليكلي دي، چې له ولسمشر كرزي سره مخالفت او د هغه د ګوښه كولو هڅه يوه ستره اشتباه وه.
ورځپاڼې وړاندې ليكلي دي، چې امريكا او كرزى د يو بل منلو پرته بله لاره نه لري او بايد دواړه اړخونه پردي فكر وكړي.
د ورځپاڼې د همدې مخ په غټ سرليك كې دا خبر وركړل شوې، چې امريكا په اسلام اباد كې د سيمې په كجه لوى استخباراتي مركز جوړوي.
ورځپاڼې په دوام كۍ بيا ليكلي ، چې چين په اسلام اباد كې د امريكا د ورځ په ورځزياتيدونكي نفوذ او شتون په اړه انديښنه ښودلې.
ورځپاڼې په يو جلا څيړنيز مطلب كې امريكا د استخباراتي ادارو پر بنسټ په افغانستان كۍ د ايران لاس وهنه څيړلې او ليكلي، چې دغه هيواد په افغانستان كې د مداخلې حق نلري.
هيواد:
دې دولتي ورځپاڼې د خپل لومړي مخ زياته برخه له سي ان ان ټلويزيون سره د ولسمشر كرزي مركې ته ځانګړې كړې او د ښاغلي كرزي په حواله يي ليكلي، چې افغانان د انتخاباتو په بهير باور لري خو له بده مرغه نړيوالې رسنى دې مسـالې ته لمن وهي.
ورځپاڼې ددې مركې يوه بله برخه هم راخستې او پكې د ښاغلي كرزي په نقل ليكل شوي، چې يوازې د بهرنيو سرتيرو زياتوالى نه بلكې اقتصادي وده، د حكومت د وړتياو زياتول او د سيمې د هيوادونو د باور جلبول د افغانستان ستونزې اوارولى شي.
ورځپاڼې بيا هم پخپله سرمقاله كې د انتخاباتو په وړاندې د ځينو بهرنيو كړيو دريځونو ته كتنه كړې او ليكلي دي، دغو كړيو خو د انتخاباتو په ورځ د ډاډمن امنيت ژمنه خو پوره نكړاى شوه خو كومو خلكو،چې په انتخاباتو كې د سر په بيه برخه اخستې اوس د هغوې د رايو درناوې هم نه كوي.
ورځپاڼې وړاندې له دې كړيو نه غوښتې دي، چې د درغليو تر نامه لاندې روانه ډرامه پاې ته ورسوي.
راه نجات:
دې نا دولتي ورځپاڼې په يو مطلب كې د ملي شورا د وكيلانو د غير حاضرى مساله راخستې او هغه يي يو داسې زوړ درد بللې، چې د ورځپاڼې په وينا هيڅ دوا نلري.
ورځپاڼې پخپل يو څيړنيز مطلب كې د افغانستان په شمال كې د وسلوالو فعاليتونه څيړلي او ليكلي دي، چې دغو سيمو ته په سلګونو بهرني وسلوال ورغلي دي.
ورځپاڼې په افغانستان كې د بهرنيو سلاكارانو فعاليت ته هم كتنه كړې او ليكلي، چې په ميليونونو ډالره بهرنى مرسته ددغو سلاكارانو جيبونو ته غورزيدلې.
اصلاح او انيس:
دې دولتي ورځپاڼو هم په بيلابيلو مطالبو كې د افغانستان او سيمې حالات راخستي او له بيلابيلو اړخونو يي څيړلې دي.
انيس پخپله سرمقاله كې په افغانستان كې د ناټو د قومندان په راپور تبصره كړې او ليكلي، چې دده لخوا د ستراتيژۍ د بدلون غوښتنه پدې معنې ده، چې د ناټو پخوانۍ تګ لاره ناسمه وه.
اصلاح بيا پخپله سرمقاله كې د اوباما د وروستو څرګندونو ځينې برخې راخستې او د هغه په حواله يي ليكلي، چې القاعده په افغانستان كې پراخ شتون نلري.