لراوبر ویب پاڼه لراوبر يو افغان – تازه خبرونه
د لوګر امنيه قومندان غلام مصطفى محسني وايي د نن سهار د چاوني قربانيان ٢٥ تنو ته ورسېده.
دغه چاودنه د يوه ښوونځي مخته د ګڼي ګوڼي پر يوه ډک سړک د لوګر ولايت په محمدآغې ولسوالي کي سوې ده.
امنيه قومندان وايي چاودونکي توکي په يوه لارۍ موټر کي ايښودل سوي وو چي د سيمي څخه د پوليسو د ګزمې د تېرېدو پر مهال يې انفجار کړى دئ.
د لوګر د والي وياند دين محمددروېش وايي په دې پېښه کي څلور پوليس وژل سوي او پاتي ٢١ کسان يې ټول ملکي خلګ دي چي ډېرى يې د ياد سوي ښوونځي زدکوونکي دي.
په دې چاودنه کي چي تر اوسه يې مسئوليت چا پر غاړه نه دئ اخيستئ، ٣٠ تنه نور ټپيان سوي هم دي.