لراوبر ویب پاڼه لراوبر يو افغان – تازه خبرونه
د کندهار والي توريالى ويسا وروسته له هغه په ولايتي شورا کې محاصره شوى چې په ښار کې د پوليسو او خارجيانو ترمنځ نښته شوې او د ښار په ځينو سيمو کې د ډزو ږغونه اورېدل شوي دي.
ققنوس آژانس وايي د کندهار والي توريالى ويسا او د ولايتي ادارې نورو کارکوونکو په ولايتي شورا کې غونډه درلوده چې پر ځينو دولتي ودانيو يې د وسله والو بريدونو خبر ترلاسه کړ.
که څه هم د کندهار ښاريان د نننۍ کړکېچنې وضعي علت د مرافعه څارنوالۍ مخې ته امنيه قومندان او امريکايي پوځيانو ترمنځ نښته په ګوته کوي، خو ققنوس آژانس وايي د کندهار په ښار کې پر دولتي ودانيو د وسله والو موټرسايکل ناستو له خوا بريدونه شوي دي.
د کندهار ښار اوسېدونکې له يوه بې باوره حالت سره مخ دي او د ښار په مرکز هرات دروازه کې اوس هم ډزي اورېدل کېږي.
بلې خوا ته د کندهار د ولايتي شورا رئيس احمدولي کرزي هغه خبرونه رد کړي چې ګنې امنيه قومندان مطيع الله قاطع او د جنايي جرمونو د مخنيوي مدير عبدالخالق د خارجيانو له خوا وژل شوي دي.
احمدولي کرزى وايي د پوليسو دغه لوړ پوړي مشران د امريکايي سپېشل فورس له خوا د روزل شويو افغان ځواکونو په ډزو وژل شوي دي.
په کابل کې د امريکايي پوځيانو وياند هم دغه نښته تائېد کړې ده، خو د پېښې په باب يې نور جزيات نه دي ورکړي.
په کندهار کې د نننۍ اله ګولې اصلي لامل معلوم نه دئ، خو ويل کېږي جنجال د يوه جنايي مجرم پر سر راپورته شوى دئ، چې امريکايي ځواکونو يې له مرافعه څارنوالۍ څخه په زور د ايستلو هڅه کوله، څارنوالي له امنيه قومندانۍ څخه مرسته غوښتې چې وروسته امنيه قومندان خپله سيمي ته ورغلى وو او شخړه رامنځټه شوې وه.
نور جزيات وروسته پر ليکه کېږي.