لراوبر ویب پاڼه لراوبر يو افغان – تازه خبرونه
نړۍ : ريس صيب! که پيل کې د نړۍ اونيزې لوستونکو ته ځان ور وپېژنئ.
سيدرزاق پاچا : بسم الله الرحمان الرحيم ، زما نوم سيد عبدالرزاق د ننګرهار د ارزاقو ريس يم.
نړۍ: ستاسو اداره دا مهال پر کومو دندو بوخته ده؟ څه لاسته راوړنې لرئ؟ که لنډ معلومات راکړئ.
سيدرزاق پاچا : د ارزاقو رياست وظيفه چې له نامه يې معلومېږي دا ده چې د ارتزاقي موادو توزېع ، دولتي مامورينو او اجيرانو ته کوپون ورکول او په عسکري قطعاتو کې چې کوم غذايي مواد پخوا اخېستل کېدل دا به د ارزاقو نه راتلل دلته به يې مکتوب راوړ، د ضروت مطابق به مونږ ورته خپلو ګودامونو نه تهيه کول، که به دلته نه و ازاد بازار نه به همکاري اخېستل کېده، اوس مونږ ګودامونو کې هېڅ مواد نه لرو، يوازې شل ټنه د کاليو مينځلو پوډر دي چې مونږ له مرکزه راوړي او في کيلو په (٣١)افغانۍ په راډيو تلويزون کې هم اعلان کړي چې پر ټولو محترمو ښاريانو يې خرڅوو، دې نه غير ګودامونو کې هېڅ داسې څه نه لرو چې د کوپون په ذريعه ياد ولايت د هدايت له مخې يې پر مستحقو خلکو ووېشو.
نړۍ: مخکې کوپون ورکول کېده،په داسې حال کې چې د دولت امکانات هم لکه اوس دومره ډېر نه و، اوس سره له دې چې ډېر هېوادونه د افغانستان دولت سره مرستې کوي خو بيا هم مامورينو ته د پخوا په څېر اسانتياوې نشته، لامل يې څه دى؟
سيدرزاق پاچا : خبره داده چې دولتي سکتور ته توجه نشته. زمونږ امېد دولت نه دادى چې خصوصي سکتور ته د ودې تر څنګ دې دولتي سکتور ته توجه وشي ، دواړه دې سيالۍ کې واچول شي، د امکان په صورت کې کېداى شي په يوه برخه کې خصوصي سکتور ته يو مسئوليت ورپه غاړه کېږي نو دولتي سکتور ته دې هم يو مسوليت ور په غاړه شي، بيا دې د تفتيش يو ګروپ وي قضاوت دې وشي،عامو خلکو ته دې دا قضاوت پرېښودل شي چې کومه اداره ښه ده او کومه بده! اوس فعلاً خو دولتي سکتور ته هېڅ توجه نشته او په دې اوه نېمو کالو کې چې مونږ دلته راغلي يو،يو ځلې غنم مرکز نه راغلي چې د پيسو مقابل کې چې مونږ پر دې قانع نه يو، مونږ د خپلو مامورينو او اجيرانو لپاره داسې مواد غواړو چې په مخکينيو نظامونو کې د دې خلکو لپاره وه.
نړۍ: د دې لامل څه دى چې حکومت تاسو ته توجه نه کوي؟
سيدرزاق پاچا : خو علت به يې زه څه…. ((چوپتيا)) خو زمونږ غوښتنه ده، زمونږ وړانديز دى مونږ خپل صلاحيت کې څو ځلې ولايت ته عارض شوي يو او د ولايت مقام د هدايت سره سم مونږ ته رسمي مکتوب راکړ شوى، وزيرانو شورا ته مو ويلي که چېرې تاسې ارزاق په پښو ودروئ دا مکتوب مونږ هلته لېږلى. له دې نه اضافه صلاحيت مونږ سره نشته، زمونږ د خپل اسلامي جمهوري دولت او وزيرانو شورا نه هيله داده چې لطف وکړي د ارزاقو اداره دې پر پښو ودروي.که چېرته زمونږ مامورين له ناکامۍ سره مخ شوه او ويې نه شو کولاى چې دغه مسوليت ښه په مېړانه، شجاعت، د وطن پرستۍ د روحيې مطابق اجرا نه کړ، بيا يې مونږ تنقيص ته هم حاضر يو، بيا دې بېخي دا اداره له منځه يوسي او بل وزارت پورې دې مربوط کړي. زمونږ مامورين دلته اوسېږي، معاش اخلي خو کار ورته نشته حال دا چې دېرش پينځه دېرش کلنه سابقه دار مامورين دي. د دوئ استعداد، د دوئ تجربو، د دوئ انرژۍ نه بايد دولت د ابادۍ او جوړښت په برخه کې استفاده وکړي زمونږ دغه يو خواهش دى، مونږ خو نور څه نه شو کولاى.
نړۍ: افغان دولت او مرستندويې ټولنې د مرستو د وېش په اړه وايي چې دولتي سکتور پخوا ناکام شوى ، تاسو څه وايئ؟
سيدرزاق پاچا : مخکې هم دلته دولتونه وو، نظام و، قانون و، فرامين و، دلته دولت کې خلکو وظيفه اجرا کوله، دوى دې يوه امتحاني پروژه رامخکې کړي چې رېښتيا هم مونږ د دې اهليت لرو او کنه؟ دا خو په الفاظو نه وېل کېږي چې خصوصي سکتور اهليت لري دولتي يې نه لري، دا هم عقل مني؟
نړۍ: دا پر تاسو د دولت نا باوري نه ښيى چې خصوصي سکتور ته توجه کوي تاسو ته يې نه کوي، هغوى تر تاسو کومه ښه ځانګړنه لري؟
سيدرزاق پاچا : مونږ خو د دولت د قانون، د فرامينو او اوامرو فوق العاده احترام کړى او بيا يې هم کوو، خو زه د افغانستان د يوې ادارې د يو غړي په صفت خواهش کوم چې همدغه پروسه دې په تجربه کې واچوي،که چېرته غواړي چې دا بازار کنټرول شي ، دا نرخونه کنټرول شي بغير د ارزاقو، بغير له موادو نه دا نه کنټرولېږي، خصوصي سکتور خو داسې شى دى چې د تجار خوښه ده چې يو شى په سل روپۍ ورکوي او که په زر روپۍ. د دولت په دې څه قيودات نشته، مونږغواړو چې د دوى څه مسايل دې په داخل د ولايت، داخل د مرکز د دولتي ارګانونو تر سېوري او پوښتنو لاندې اجرا شي ځکه له دې غير دا کارونه ګډوډي مينځته راولي، د بازار نرخونه خرابوي،ګوره دا ګودامونه جوړ شوي په ميلونونه ډالره مصرف پرې شوى خو تش پراته دي دا خو د همدې لپاره جوړ شوي چې خداى مه کړه کوم اضطراري حالت رامنځته شي نو د ضروت په وخت کې خپل ملت، خپل ولس او اردو ته توزېع شي. مونږ د خصوصي سکتور مخالفت نه کوو، مونږ خپل حقوق غواړو چې څومره توجه خصوصي سکتور ته کېږي د هغې دويمه برخه دې دولتي سکتور ته هم وشي.
نړۍ: تاسو څومره کارکوونکي لرئ؟ دوئ اوس څه کوي؟ او تاسو ته د دولت څومره بوديجه ځانګړې ده؟
سيدرزاق پاچا : مونږ تقريبا په يو اتيايم کال کې راغلو، مونږ ته رياست عمومي لخوا هدايت وشو چې پخوانى تشکيل مو منظور دى، تقريبا ١٢٥تنه مامورين او اجيران مو لرل، تشکيل راغى او منظور شو خو دې لپاره چې مونږ ته د اجرا زمېنه مساعده نه وه، مونږ اساسي فعاليتونه نه لرل. کال په کال تشکيلات راتله حتى اوس دغه دى چې د ارزاقو د رياست تشکيل ٣٥ تنو ته راکېووت، د ټولو اجيرانو او مامورينو په ګډون نو داسې فکر وکړه چې دا اداره له منځه تللې خو په دې برخه کې زمونږ ګيله دا ده چې زمونږ دېرش کلن مامورين تنقيصيږي خو د هغه هېڅ امتياز نشته، مونږ نه پوهېږو چې د تنقيص مفهوم څه دى؟ يومامور چې ٣٠ کاله په يوه اداره کې کار وکړي او خپل ژوند ورته وقف کړي او خپل دولت او ولس لپاره خدمت وکړي او له دې وروسته تنقيص شي،دې ته څه وايې؟
نړۍ: د بوديجې په اړه مو څه ونه ويل!
سيدرزاق پاچا : بوديجه خو مونږ څه نه لرو د ا يوه تصدي او خود کفا اداره ده ، دا پر دولت بوج نه دى ،يوه روپۍ مونږ ته مرکز نه نه راځي.
نړۍ: چې بوديجه نه لرئ د مامورينو معاش له کومه کوئ؟
سيدرزاق پاچا : مونږ وروره ملکيتونه لرو، ارزاق په هر ولايت خصوصاً ننګرهار کې ملکيتونه لري، هغه په قانوني لحاظ په کرايه ورکول کېږي او مامورينو ته ترې معاش ورکول کېږي. مونږ په درونټه کې يو غټ ګودام لرو چې په کرايه مو ورکړى يو ګودام سنګي دى او د دې رياست شاوخوا ځينې غرفې دي چې په کرايه مو ورکړي ، نور په ولسواليو کې هم ګودامونه لرو خو دې څو کلنو جګړو کې يو څه تخرېب شوي او په کرايه مو نه دي ورکړي.
نړۍ: ريس صيب ! څومره وخت کېږي چې دولت درته توجه نه کوي؟
سيدرزاق پاچا : مونږ خو چې راغلي يو څه توجه مو نه ده ليدلې چې مونږ تشويق شوي يو، يو ځل زمونږ يو معين فراهي صيب له کابل نه راغى چې مونږ يې تشويق کړو او د دوو مياشتو بخشش يې هم زمونږ مامورينو ته ورکړ او ددې دفتر په جوړولو او د مامورينو په تشويق کې يې عمده رول ولوباوه.
نړۍ: تاسونه چې ملکيتونه څوک په اجاره يا کرايه اخلي که دا سېستم يې لږ په لنډ ډول تشريح کړئ او ووايئ چې په کال کې ترې څومره عوايد لرئ؟ څومره لګوئ؟ څومره دولت ته ورکوئ؟.
سيدرزاق پاچا : زمونږ عوايد زمونږ د معاشاتو لپاره کفايت کوي، زمونږ داسې عوايد نه دي د پينځه دېرش زرو افغانيو په شاوخوا کې به وي. مثال که د ګودام سنګي پينځه دېرش زره افغانۍ کم وزيات هغه رسمي قرارداد دى د ولايت، مستوفيت، قضايې دولت،د ارزاقو نماينده د دوى په حضور دا ورکول کېږي، د راډيو تلويزون له لارې اعلان کېږي ، هرڅوک کولاى شي داوطلبۍ ته راشي بيا څوک چې يې نيسي هغه به قانوني مراحل سرته رسوي دا کراګانې مونږ ته د معاش کفايت کوي.
نړۍ: دا عوايد مو بانک ته ځي که خپلو کې يې وېشئ؟
سيدرزاق پاچا : مونږ د ملکيت يوه روپۍ هم نه شو اخېستى، ټولې بانک ته تسلېمېږي. مونږ دا اووه اوه نېم کاله کېږي د کرايې او قرارا داد پيسو نه يوه روپۍ هم نه ده اخېستې او نه دا حق لرو، هغه بانک ته تحوېلېږي او بانک نه مونږ ته په قانوني انداز معاشونه راکول کېږي په شخصي لحاظ هېڅو ک نه دلته روپۍ راوړى شي او نه يې چا ته ورکوى شي.
نړۍ: ريس صيب! بېرته به لږ مخکې لاړ شو، تاسو ارزاقو ته د دولت د نه پاملرنې علت راجوت نه کړ خو هغه څه چې نړيواله ټولنه او افغان ولسمشر کرزى يې خپله مني چې دولت په فساد کې ډوب دى، ستاسو په اند همدا علت به نه وي چې دولتي سکتور ته د مرستندويو ټولنو پاملرنه کمه شوې ؟
سيدرزاق پاچا : زه خو د خپلې ادارې مطابق وايم څوک چې کومې ادارې ته منسوب دى د هغې ادارې نمايندګي هم کولاى شي
نړۍ: که په عامه توګه ووايئ!
سيدرزاق پاچا : په عامه توګه خو څه نه شم ويلاى چې ما پورې اړه نه لري خو د ارزاقو په اړه وايم چې دارزاقو مامورين، منسوبين پر خپل وطن مېن خلک دي، مونږ ددغې ادعا چې پر مونږ کېږي سل فيصده مخالف يو.
نړۍ: خپله ولسمشر کرزى دا خبره مني
سيدرزاق پاچا : مونږ يې نه منو، مونږ ته په دې اووه نېمو کالو کې چې کوم مسوليت راسپارل شوى تاسو مونږ ته راوښايئ ، پوښتنه وکړئ چې په کوم مورد کې خداى مه کړه اختلاس شوى وي.
نړى: ښه نو بيا د ارزاقو رياست سره ددولت د نه همکارۍ علت څه کېداى شي؟
سيدرزاق پاچا : زمونږ صلاحيت دغه دى چې وړانديز مو کړى، نور صلاحيت نه لرو چې د خپلو مشرانو … مونږ چې څه غوښتل مونږ خپلې غوښتنې تحريراً د ولايت مقام په تاييد سره لېږلي، نور کار د هغو دى. مونږ خپل فرياد کړى چې دا عمل ددې ولس لپاره، د دې مامورينو لپاره مفېد دى داسې څوک نه دي راغلي چې مونږ سره مستقيماً مقابل شوي وي چې دا ولې مفېد دى؟ چې مونږ يې قانع کړو چې ګودامونه شته،مامورين شته،ګودامدار شته، جم و خرچ شته، ته چې کوم مواد راوړې دلته يې راوړه کېداى شي چې لس کاله وروسته هم د دې موادو پوښتنه وکړې
نړۍ: ريس صيب! ستاسو دنده داده چې ولس ته خدمت وکړئ خو دولت درته پاملرنه نه کوي، تاسو دا کار ولس ته ددولت نه پاملرنه او د دولت ناکامي نه ګڼئ؟
سيدرزاق پاچا : بالکل!
نړۍ: يانې دا ولس سره د دولت زياتى دى کنه؟
سيدرزاق پاچا : خو خير مونږ دومره وايو چې زمونږ کوم نظر او پېشنهاد و، زمونږ تحريري کومه غوښتنه وه، مونږه د ولس لپاره مفېد ګڼله، مونږ خپل مسوليت رفع کړى. نور د هغو اداراتو کار دى چې په دې مورد کې مسوليت لري او ددې صلاحيت لري. بيا هم مونږ له هغو غواړو چې دغه دولتي ادارت پر پښو ودروي. دې کې پوه، تعليم يافته کسان شته، دېرش پېنځه دېرش کاله چې څوک يو مسلک کې کار وکړي نو تاسې متخصص چا ته وايئ لطف دې وکړي شخصي او دولتي سکتور دې رقابت وکړي، دا اووه کاله کېږي چې زمونږ مامورين ځي راځي خو کار يې مالوم نه دى، دا داسې مانا لري لکه يو څوک چې تعمېر جوړوي ګېلکاران او مزدوران راولي او تر مازېګره چټي ناست وي، ماښام پيسې واخلي او ځي.
نړۍ: يانې په دې اوه نېم کالو کې تاسو هېڅ نه دي کړي؟
سيدرزاق پاچا : هېڅ مو نه دي کړي هېڅ، او نه څه راغلي. يواځې دا اوس يو شل ټنه د جامو وېنځلو پوډر راغلي، دولت دې لطف وکړي دا دې په بل وزارت کې مدغم کړي، د دوى انرژۍ نه دې استفاده وکړي، دا څه مطلب دى چې معاش اخلم او کار نشته، آخر مو پر دې خپل وطن زړه خوږېږي چې دا ولس ډېر ځورېدلى دى او بايد د هر مامور له پوهې او تجربې استفاده وشي، او که نه کېږي د قانوني مسايلو په رڼا کې دې تقاعد شي، تنقيص دې شي، دېرش کلن مامور دېرش کاله يې دنده اجرا کړې وي، فوق رتبه وي، رتبه اول وي، هغه دې راواخيستل شي او تنقيص دې شي، ددې پوښتنه نشته چې ولې تنقيص؟
نړۍ: تر دا مهاله ستاسو څومره کسان تنقيص شوي؟
سيدرزاق پاچا : تقريباً اتيا کسه تنقيص شوي
نړۍ: تاسو يې دولت سره ستونزه شريکه کړې؟
سيدرزاق پاچا : په کراتو،کراتو که تاسو زمونږ صادره او وارده وګورئ چې مونږ د دې مامورينو په اړه څومره مکتوبونه لېږلي، هغوى هم وايي چې مونږ لوړو مقاماتو ته پېشنهاد کړى، د وزيرانو شورا ته، نو زمونږ ترې دا هيله ده چې دا مامورين تاسو سره په درې زرو روپو کار کوي د دوى حقوق څه چې قانون ورکړي بايد ورکړل شي.
نړۍ: دا د بازار د نرخونو مساله پخوا تاسو پورې تړلې وه، اوس خو ښاروالي هم پکې دنده لري،تاسو اوس پکې څه مسوليت لرئ؟
سيدرزاق پاچا : زما نه يادېږي چې په دې اوه نيمو کلو کې دې ماته دا وظيفه راکړل شوي وي او زه دې بازار ته وتى يم. کله کله چې په اداري مجلس کې دوئ څه لازم وګڼي او کومې هيئتۍ ته لاړ شو هغه دى کنه رسماً د ادارې په نامه څه نه لرو.
نړۍ: زمونږ د معلوماتو له مخې ستاسو پخواني اړوند مواد ځينو نورو ادارو لکه انکشاف دهات،زراعت او …ته په واک کې ورکول کېږي، دا د مرکز کار دى، که د ولايت ؟ او ايا تاسو په دې اړه څه غبرګون ښودلى؟
سيدرزاق پاچا : صيب! نو مونږ خو په اداري مجلس کې دا خبره کړې، ولايت مقام ته مو خپل فرياد په شفاهي او تحريري دواړو لارو وررسولى، زمونږ غوښتنه ده چې دې چټي تلونکو او راتلونکو د ارزاقو مامورينو نه دې کار واخېستل شي. مخکې چې به په کانال کې څومره غنم ورسېدل، پاک به يې کړل،چاڼ به يې کړل چې کله به اخېستو ته تيار شول نو ارزاقو ته به يې حواله کړل.
نړۍ:تاسو په دې باوري ياست چې ولايت مو ستونزې لوړ پوړو چارواکو سره شريکې کړي؟
سيدرزاق پاچا : بلې، يو ځل خو مونږ شاهد يو چې د ولايت په لاسليک د ټولو رسمي اداراتو په موافقه مونږ يو درخواستي کړې وه، ما خپله کابل ته وړې وه چې بېرته مونږ ته کوم منفي يا مثبت ځواب نه دى راکړل شوى.
نړۍ: دا ولې د ولايت نورې غوښتنې منل کېږي دا نه منل کېږي؟
سيدرزاق پاچا : نو،نو…((جوپتيا)) ما خو …ماخو مخکې هم تاسو ته وويل چې دا مونږ به پخپل صلاحيت پورې پخپل چوکاټ کې غږېږو زمونږ دومره صلاحيت دى چې ….
نړۍ: تاسو د دې دندې سره خوا کې يو افغان ياست! ځان پر وطن مېن ګڼئ! د يوه خپلواک افغان په توګه که هر څه صفا صفا ووايئ!
سيدرزاق پاچا : صيب ولا زه خو خپله ځان دې ولس ته پړ ګڼم چې مونږ دا اووه نېم کاله د دولت معاش واخېست، د دولت په حوېلۍ کې مو چټي اووه نېم کاله تېر کړل، د ريس او مامور نوم مو پر ځان پورې کړ او کوم امتياز چې د دولت دى هغه مونږ اخېستى خو مونږ خپل ولس ته هېڅ نه دي کړي.
نړۍ: ولې يې نه کوئ؟
سيدرزاق پاچا : مونږ نو خپل غږ نور چا ته وباسو، ته ما ته بله داسې مرجې را وښايه چې هلته زمونږ خبرې نتېجه ورکړي چې زه هغه ته ورشم، ورته وژاړمه. مرکز ته تللي يو،دلته چې کومې ادارې دي هغوى سره مو خبرې شريکې کړي، په اداري مجلس کې زمونږ محترم مشران دي، ولايت مقام دى، د پارلمان وکيل صاحبان راغلي و هغوى سره مو دا خبره شريکه کړې وه داسې بله مرجې نشته چې مونږ لاړ شو او خپل فرياد وکړو.
نړۍ: آيا ولس ته مو خپلې ستونزې روښانه کړي؟
سيدرزاق پاچا : بلې، ولس ته مو راډيو ګانو نه په شرق راډيو کې مونږ سره مرکه وه ما خپلې ټولې ستونزې له هغې لارې ولس ته روښانه کړي.
نړۍ: نو دا درسره څوک نه مني؟
سيدرزاق پاچا : هېڅوک يې نه مني مونږ چې چاته وړانديز کړى مثبت ځواب نه دى راکړل شوى.
نړۍ: تاسې چې دولت پړ بولئ او وايئ چې له اوه نېم کلونو راهيسې درته پام نه کېږي نو ولې استعفا نه کوئ؟
سيدرزاق پاچا : زه خو همدا اوس هم استعفا ته حاضر او تيار يم.
نړۍ: يانې استعفا مو نه منل کېږي؟
سيدرزاق پاچا : عرض لرم ، ما دا ستونزه په اداري مجلس کې د پارلمان د څو وکيل صاحبانو مخکې ياده کړې که چېرته دې ادارې نه دولت استفاده نه شي کولاى ،کوم بل وزارت کې دي مدغم کړي،يادې ټول تقاعد کړي.
نړۍ: دا به کله وشي دې اووه نېمو کلو کې چې ونه شوه، دې نه وروسته به وشي؟
سيدرزاق پاچا : مونږ خو په امېد يو کنه، چې نن به راسره کومک کېږي سبابه کېږي. دا دى اوس هم امېد راکړل شوى دى انشاالله خرېدادري به وشي د قزاقستان او تاجېکستان نه به غذايي مواد تجارت وزارت اخلي.
نړۍ: هغه کوم چې اخېستل شوي ، نو نورو ادارو ته ورکړل شوي.
سيدرزاق پاچا : چې اخېستل شوي مونږ ته نه دي راکړل شوي، تجارت وزارت دا مواد اخېستي خو مونږ نه پوهېږو چې ايا ارزاق رياست د دې وزارت يوه برخه ده که انکشاف دهات؟ انکشاف دهات خو بل وزارت دى او د زراعت بل.
نړۍ: له اوه نيمو کلنو وروسته اوس هم هيله من ياست او څه هيله لرئ؟
سيدرزاق پاچا : زمونږ امېد نه دى قطع شوى، زمونږ امېد شته. زمونږ د تجارت وزير نه هيله ده چې خپلې ادارې فعالې کړي او که نه فعالېږي،امکانات ورسره نه وي،دولت يې ورسره نه مني،اوستى نظام يې ورسره نه مني او لازم يې نه ګڼي بيا دې مدغم کړي بله اداره کې که يې چېرته نه مدغموي د تنقيص پر ځاى ښه خبره دا ده چې ټول تقاعد کړي،د دې مې مخکې هم پېشنهاد کړى و اوس يې هم کوم.
نړۍ: پارلمان ته مو خپله دا ستونزه وړاندې کړې؟
سيدرزاق پاچا : د پارلمان وکيل صاحبان دلته راغلي و ببرک شينوارى و، فاروق مېړنى و او څو نور هم و، په اداري مجلس کې مونږ سره ناست و،د همدې اداراتو مشکلات يې اورېدل،نو مونږ دا خپل مشکل په قانوني انداز وړاندې کړ، هغوى ويل دا مشکل به تجارت وزير سره مطرح کړوخو متاسفانه تر اوسه نه مطرح شوى اونه مونږ ته منفي يا مثبت ځواب راکړل شوى .
نړۍ: يانې دا د دې وکيل صاحبانو پر نه ژمنتوب او نه وفا دلالت کوي؟
سيدرزاق پاچا : نو، نو ما خو درته وويل چې مونږ خپل مشکل ويلى، دا چې ډاکټر زمونږ تداوي نه ده کړې دا د ډاکټر مسوليت دى، مونږ خپله ستونزه روښانه کړې.
نړۍ: يانې تاسو ببرک شينوارى،مېړنى او نور وکيلان پړه ګڼئ؟
سيدرزاق پاچا : ولې يې پړه نه ګڼو، مونږ د ارزاقو مورد کې ټول دولت پړ ګڼو.
نړۍ: ريس صيب په اوه نېم کلو کې درسره څه ونه شول او رياست مو تش په نوم رياست دى، که بيا همدا حال وي ستاسو غبرګون به څه وي؟
سيدرزاق پاچا : يره که ونه شوه زه انشاالله درې مياشتې وروسته په دې اداره کې نور کار نه کوم، په هغو مخکينيو کارونو مې هم پښېمانه او خپل وجدان او ضمير ته ډېر سخت خجالته يم. ماچې څه غوښتل زه دې د يو مسلمان افغان په صفت خپل مظلوم ولس سره څه وکړم، هغه ونه شول. زه مجبوريم چې نور يا کوم شخصي کار يا بله اداره کې کار ته مخه کړم.
نړۍ: که وزارت هېر کړو،د ننګرهار ډېرې داسې ادارې شته چې د پروپوزلونو په جوړولو يو شمېر پروژې ترلاسه کوي،کار کوي تاسې داکار نه شئ کولاى که صلاحيت يې نه لرئ.؟
سيدرزاق پاچا : په دې قبايلو کې تقريباً څلور ورځې سېمينار و، نور څو وارې سېمينارونه جوړ شول،چې کومه غونډه کېږي پکې برخه اخلو، پروپوزلونه مو هم ورکړي.
نړۍ: چاته؟
سيدرزاق پاچا : زمونږ خو دلته اقتصاد رياست دى چې خپل مشکلات مو ورته ويلي او پروپوزلونه مو ورکړي، هغوى که هم اوس وغواړي په دې دولتي ملکيتونو کې دارزاقو…
نړۍ: اقتصاد رياست تاسو ته څه کولاى شي؟
سيدرزاق پاچا : بالکل، مارکېټونه جوړولاى شي
نړۍ: چې ستونزې مو حلولاى شي، ولې يې نه حلوي؟
سيدرزاق پاچا : والله څه ووايم!
نړۍ: تاسو څوپروپوزلونه ورکړي؟ کومو برخوکې ؟ او د هغوى ځواب څه و؟
سيدرزاق پاچا ::مونږ دګودام سنګي يو پروپوزل ورکړى چې نتېجه يې نه ده ورکړې، د درونټې د ګودام، همدا شان هره ولسوالۍ کې د خپل ملکيت پروپوزل مو ورکړى چې نتېجه يې نه ده ورکړې.
نړۍ: تاسو ولې دا ستونزه ولايت مقام سره نه ده شريکه کړې؟
سيدرزاق پاچا : مونږ ته خو اقتصاد رياست معرفي شوى چې خپل مشکلات او پروپوزلونه په دې برخه کې دوى ته وسپارئ
نړۍ: اقتصاد رياست سره د نتېجې نه ورکړې ستونزه مو ولايت سره نه ده شريکه کړې؟
سيدرزاق پاچا : مونږ شريکه کړې، څو څو ځله سره ناست يو.
نړۍ: يانې په دې اړه ولايت پړ دى؟
سيدرزاق پاچا : دا د پړ مسئاله ، خو ګوره په دې اداره کې خو نزاکت دى، د مشر کشر دا خو ګوره لازمه نه ده چې زه ووايم ولايت پړ دى.
نړۍ: که د خلکو ستونزو ته وګورو او د يو عام وګړي په توګه نظر راکړې چې ولايت پړ دى کنه؟
سيدرزاق پاچا : زمونږ ولايت خو الحمد لله د ننګرهار اداره ډېره فعاله ده، ان د افغانستان په سطحه!
نړۍ: نو بيا ولې ستاسو دا ستونزه نه حلېږي؟
سيدرزاق پاچا : زمونږ مشکل دى، زمونږ مشکل دى، زه در ته وايم د يو انسان وجود کې ګوره مثال سترګه چې په تکلېف وي نو ټول بدن ورسره په تکلېف وي نو ټوله تداوي د يو انسان يو ځل نه کېږي.
نړۍ: تاسو مخکې وويل مونږ منډې،تړړې کوو، اوس ولايت پړ نه ګڼئ ، وايئ زمونږ مشکل دى؟
سيدرزاق پاچا : نه، مانه دي ويلي، زه دا وايم چې دلته په اداره کې يو څه صلاحيت لرو، د خبرو صلاحيت هم لرو، د ليکلو هم مونږ له دې نه اضافه څه نه شو ويلاى چې خپل يو مربوطه مقام ته چې زمونږ آمرين دي، مونږ خپل مشکل ويلى نور د دوى صلاحيت دى يو کار کوى شو چې دوه مياشتې وروسته بيا دا پروګرام تعقېب کړو
نړۍ: تاسو وويل د يو افغان په توګه نه غواړئ په يوه نا خدمتګاره اداره کې د ريس دنده ولرئ او درې مياشتې وروسته استعفا کوئ، ستاسو ددې استعفا لامل د ولايت د مقام بې غوري ده که څنګه ؟
سيدرزاق پاچا : مونږ د يو وزارت مربوط يو، هره اداره چې کوم ولايت کې وي د هغې مسوليت وزارت پورې دى.
نړۍ: د پروپوزلونو د نه منل کېدا په اړه څنګه؟
سيدرزاق پاچا : په دې اړه اداري مجلس کې هدايت شوى چې پروپوزلې اقتصادرياست ته ورکړي، ګوره زه وايم د صحت مساله زمونږ ډېره مهمه ده، ځکه صح ي مساله ده،که د صحت برخه کې يو کلينيک،روغتون جوړ شي مونږ پرې خوشالېږو.
نړۍ: دا پارکونه چې جوړېږي، د غونډو تالارونه،…همداسې ځينې نور در واخله، ستاسو اداره د هغو هومره ارزښت نه لري؟
سيدرزاق پاچا : درست دى ،درست دى، بلې! دا درست دى، دا مونږ منلې چې زمونږ د ولس عمده مشکل همدا ارزاق دي پر دې مونږ يقيني يو.
نړۍ: تاسو خپلو خبرو کې ننګرهار ولايت مقام وستايه، يو قوي مقام مو ورته ووئ چې قوي مقام وي نو ارزاقو په شان رياست به يې ولې اووه نېم کاله تش په نوم رياست وي؟
سيدرزاق پاچا : دا خو دا،دا، خو ګوره زه به ووايم، زه بايد ووايم، بايد ګيله له خپل وزارت نه وکړم چې مسلکي کسان پکې دي ولايت ځکه پړ نه ګڼم چې نور خو يې يو څه کړي، سړک جوړ شوى، روغتون جوړشوى،پارک جوړ شوى…
نړۍ: پارک مهم دىکه ستاسو اداره؟
سيدرزاق پاچا : مهم خو زمونږ اداره ده پارک څه چې مکتب نه هم مهمه ده.
نړۍ: تاسو د يو وزارت ريس يئ، ښايي خبره مو څوک وانه وري، والي يا کوم بل لوړ پوړى چارواکى دا کولاى شي، والي مو د ولسمشر سلاکار هم دى، دا ورسره نېغ په نېغه شريکولاى شي، که څنګه همداسې نه ده؟
سيدرزاق پاچا : يره وروره! د ارزاقو برخه کې دلته هېچا هم مونږ ته کوم عملي کار نه دى سپارلى چې ترسره يې کړو زما هيله بيا هم داده چې دا اداره دې يا اکمال، يا مدغم يا يې مامورين تقاعدکړي.
نړۍ: د خپلې راتلونکې په اړه درسره څه هيله شته؟ څه برياوې به ولرئ؟ څه وعدې درسره شوي؟ څه پلانونه لرئ؟
سيدرزاق پاچا : نو امېد خو هر انسان لري بې امېده انسان به نه وي.
نړۍ: ته څه وايې چې له اسمانه به د ارزاقو پر رياست څه را وورېږي؟
سيدرزاق پاچا : نه،نه له اسمانه څه نه ورېږي، داسې کېداى شي چې زمونږ د تجارت وزارت کې داسې څوک پيدا شي چې وزيرانو شورا کې دا خبره ياده او ننګه يې وکړي
نړۍ: ريس صيب! مننه چې دې خړ ماښام کې دې د نړۍ د لوستونکو داسې سپينې پوښتنې په ورين تندي ځواب کړې
سيدرزاق پاچا : له تاسو هم ډېره زياته مننه او قدردانى چې د خلکو دې لوى مشکل ته مو پام وکړ او دومره زحمت مو ووېست چې دلته راغلئ او زمونږ احوال مو واخيست.
