د پپښتو سره

محفل  ته د رندانو، د پپالو سره راځه
پوښتنې د ساقي ته،دنشو سره راځه

دا کار د دوا نه دی،خو طبيبه،که را درومې
علاج د ادم خان ته ،د درخو سره راځه

دې کلي د ړندو کښې ئې،و چا ته ورښکاه کړم
ليدو د زړۀ د داغ مې،د لېمو سره راځه

بندي د تورو شپو يمه،رويباره،  يار ته وايه
ديدن ته چې راځې نو، د ډېوو سره راځه

په توره ،خطا نشې،دلته ډېرې پڅې شوی
وطن د پښتنو ته ، د جرګو سره راځه

هوښيار د بل خوا بوځه،هسې نه چې مو رسوا کړي
مجلس د ليونو ته،لېونو سره راځه

بېګا مې خوب کښې وليدۀ،حمزه بابا،چې وائي
ټول دلته ،پښتو وائي، دپپښتو ،سره راځه

زړګۍ،د مين ياره ،لکه  بيا کوم لېونتوب کړي
راځه، د تورو زلفو، زولنو سره راځه