لراوبر ویب پاڼه لراوبر يو افغان – تازه خبرونه
د ملي راډيو تلويزون د خبري څانگي مسول نبي ساحل د ستري محکمې د يوه خبر د ځنډېدو له امله څارنوالۍ کسانو له پوښتنو ګروېږنو لپاره غوښتل سوی و .
څارنوالۍ ته د نوموړي د ورغوښتلو علت د هغي غونډي د خبر خپرېدو ځنډېدل و چي دقاضي القضات په دفتر کي د غلام جيلاني پوپل ، حنيف اتمر او ځينو نورو چارواکو لخوا جوړه سوې وه ، نوموړې غونډه په دايکنډي کي د تيري مياشتي د يوه بريداو قاضي د وژل کېدو له امله جوړه سوې وه .
نبي ساحل وايي چي نوموړی خبر ناوخته ورته رسيدلی و ځکه د هغې ورځي د خبري سرويس څخه پاته سو، نوموړی وايي د څارنوالۍ لخوا پر وخت د نه حاضرېدو په صورت کي د دندي څخه د ګوښه کېدو ګواښ ورته سوی و ، کله چي څارنوالۍ ته حاضر سو د څارنوالانو له خوا له داسي پوښتنو ګروېږنو سره مخامخ سو چي له اصلي موضوع سره يې تړاو نه درلود ، نوموړی وايي څارنوالانو د يوه مجرم په توګه سوک ورسره کړی دی .
د اطلاعاتو فرهنګ وزارت وياند ويس ناصري په وينا د ستري محکمې دا کار غير قانوني وباله او زياته يې کړه چي دوی بايد د رسنيو څخه د سرغړوني کميسون کميسون ته خپله نيوکه سپارلې وای .
تر دې وړاندي هم يو شمېر چارواکي د خبريالانو او رسنيو د چلوونکو سره په ناسم چلند تورن سوي دي ،نننۍ پېښه ښيي چي هغه څوک چي د قانون او انصاف پلي کولو دنده لري قانون تر پښو لاندي کوي .د اطلاعاتو او فرهنګ وزارت وياند د لراوبر سره د خبر پر مهال ومنله چي يو شمېر دولتي ادارې نه پريږدي چې د ملي ټلويزيون کارکوونکي مسلکي کار وکړي .
د رسنيو قانون څلورمه ماده دويمه فقره :
((هېڅ رښتينى يا حکمي کس د دولت او دولتي ادارو په ګډون نشي کولای د خبري او يا معلوماتي رسنيو فعاليت منع، تحريم، سانسور يا محدود کړي او يا په بل ډول سره د ټوليزو او معلوماتي رسنيو په چارو او خپرونو کي لاسوهنه وکړي )) .